T7 Spotlight sonte ka transmetuar emisionin hulumtues dhe dokumentues ‘’ 4 vitet e Kurtit – Nga retorika e varfërisë te luksi i pushtetit’’, nga ora 20:15 në Televizionin 7.
Përgjatë këtij episodi, duke sjellur në vëmendje retorikën akuzuese dhe kritikuese të Albin Kurtit sa ishte opozitar, kemi bërë analizimin e shpenzimeve përgjatë qeverisjes së fundit të tij.
Përmes qasjes në dokumente publike që ka kërkuar emisioni T7 Spotlight është vërejtuar se në periudhën nga viti 2021 deri në gjysmën e parë të vitit 2025, shpenzimet e Zyrës së Kryeministrit Kurti kanë ndjekur një trajektore në rritje.
Viti 2021 shënoi një nisje të përmbajtur, ku Kurti pati një shpenzim prej më shumë se 9 mijë euro, ndërsa stafi politik i tij shpenzoi rreth 10 mijë euro, kryesisht në akomodim dhe bileta udhëtimi. Kjo periudhë mund të ketë qenë e ndikuar edhe nga masat kufizuese të pandemisë COVID-19.
Në vitin 2022, panorama ndryshoi dukshëm. Kryeministri rriti shpenzimet në mbi 32 mijë euro, ndërsa stafi politik tejkaloi shifrën prej 87 mijë eurosh, në bileta e akomodim, përfshirë mëditjet. Kjo periudhë shënon poashtu mbi 54 mijë euro të dedikuara për pritje shtetërore e dreka e darka.
Viti 2023 solli një rritje enorme të shpenzimeve për Kurtin e stafin, me një total prej afro 90 mijë eurosh veç për bileta udhëtimi, akomodim e mëditje, ndërkohë që shpenzimet për ngjarje ku pati edhe ushqim, prekën shifrën e fiks 100 mijë eurove.
Në vitin 2024, tendenca e rritjes nuk ndalet. Përkundrazi – shpërthen. Vetëm Albin Kurti shpenzoi nga buxheti i shtetit të Kosovës mbi 37 mijë euro në bileta avioni e akomodim në hotele. E stafi politik kap shifrën marramendëse të gati 150 mijë eurove, përfshirë mëditjet.
E për pritje shtetërore, ceremoni dhe dreka e darka zyrtare, shpenzohen 112 mijë euro – Ky nuk ishte më thjesht një vit pune, por u bë vit i rekordeve të shpenzimeve.
Në gjashtëmujorin e parë të vitit 2025, shpenzimet janë tashmë domethënëse. Kryeministri hargjoi mbi 10 mijë euro, ndërsa stafi politik ka realizuar shpenzime që tejkalojnë 41 mijë euroshin. Edhe pse është vetëm gjysma e vitit, për ngjarje e dreka e darka janë shpenzuar mbi 48 mijë euro.
Albin Kurti në krejt këtë e ka kursyer buxhetin e shtetit vetëm duke mos marrë mëditje për vete, por njëjtë nuk veproi edhe stafi i tij, që për 4 vite e gjysmë përfituan 85 mijë euro në total.
Linku i emisionit në Yotube:
