Më shumë se 50 vende i janë drejtuar Shtëpisë së Bardhë për të nisur bisedime tregtare, ka thënë drejtori i Këshillit Kombëtar Ekonomik të SHBA-së, Kevin Hassett, në programin “This Week” të ABC News, siç shkruan The Guardian.
Ai tha: “Mora një raport nga USTR mbrëmë (zyra e përfaqësuesit tregtar të SHBA) që më shumë se 50 vende i janë drejtuar presidentit për të nisur negociatat”.
‘Por ata e bëjnë këtë sepse e kuptojnë se mbajnë barrën më të madhe të tarifave”, shtoi ai.
Hassett tha se pret “një ndikim të madh te konsumatori në SHBA”, sepse arsyeja pse SHBA ka deficit tregtar të vazhdueshëm dhe afatgjatë është, sipas tij, sepse “këta njerëz kanë një furnizim shumë inelastik”.
‘Ata kanë hedhur mallra në vend për të krijuar vende pune, le të themi, në Kinë”.
Hassett mohoi se tarifat janë pjesë e një strategjie të presidentit Donald Trump për t’i rrëzuar tregjet financiare për të ushtruar presion mbi Rezervën Federale të SHBA-së që t’i ulë normat e interesit, duke këmbëngulur se nuk do të ketë “shtrëngim politik” ndaj bankës qendrore.
The Guardian shkruan se mallrat e importuara nga dhjetëra vende dhe territore tani do të taksohen me norma shumë më të larta, dhe kjo pritet t’i rrisë kostot e gjithçkaje, nga automjetet deri te rrobat e te kompjuterët.
Këto tarifa – që mund të arrijnë deri në 50% – synojnë t’i ndëshkojnë vendet për pengesat tregtare që Trump thotë se i kufizojnë padrejtësisht eksportet amerikane dhe shkaktojnë deficit të madh tregtar.
Nuk është e qartë nëse tarifat do të jenë të qëndrueshme apo nëse Washingtoni do t’i ulë apo heqë ato si përgjigje ndaj negociatave nga vende të tjera për t’i reduktuar tarifat dhe barrierat e tyre tregtare.
Gjigantët e shitjes me pakicë në SHBA parashikuan se çmimet “me shumë gjasa” do të fillojnë të rriten në SHBA pothuajse menjëherë pas hyrjes në fuqi të një tarife 25% për eksportet nga Meksika drejt SHBA.
Amerikanët janë paralajmëruar që të përgatiten për çmime më të larta në përgjithësi gjithashtu, me familjet që kanë frikë nga një recesion në të ardhmen dhe inflacion më të lartë për shkak të tarifave.
Ekipi i Trumpit ka thënë se çdo tronditje afatshkurtër për ekonominë do të vlejë për përfitimet neto të tarifave, të cilat presidenti amerikan pretendon se do të ndihmojnë në rikthimin e prodhimit në SHBA dhe rritjen e të ardhurave nga taksat.
