Ndërtimet e objekteve banore pa leje, që përfshijnë edhe mbindërtimet në objekte banesore jashtë lejes, kanë qenë një fenomen në të kaluaren, por që me kalimin e viteve ndërtuesit ishin vetëdijësuar.
Një situatë e tillë po ndodh tashmë në Mitrovicë, pasi që kompania ndërtimore “Medi Premium” po ndërton një kat pa leje në një objekt banesor në rrugën “Nexhip Dragaj” (përballë çerdhes publike).
Në kuadër të një hulumtimi për ndërtimet pa leje, Veriu.info ka mësuar se “Medi Premium” ka tejkaluar lejen ndërtimore të lëshuar nga Drejtoria e Urbanizmit e Komunës së Mitrovicës dhe ka tashmë është në ndërtim e sipër të dy “Penthouse” pa leje. (Leja DOKUMENT)
Veriu.info ka kontaktuar Drejtorinë e Urbanizmit në Komunën e Mitrovicës, për të mësuar se a ka leje për “Penthouse” në këtë objekt “Medi Premium”, ku drejtori i kësaj drejtorie, Edison Tërnava, ka thënë se në lejen e lëshuar nga drejtoria që e udhëheq ai në këtë objekt nuk ka të paraparë “Penthouse”.
“Në materialin e përcjell nga Zyrtarja e DPU – Shyhrete Peci, në lejen ndërtimore dhe protokolin e lëshuar nga DPU etazhiteti i Objektit në fjalë është B+P+11, nuk është e cekur në leje “Penthouse””, thuhet në përgjigjen e drejtorit Tërnava për Veriu.info.
Pas kësaj përgjigje, Veriu.info të premten ka dërguar pyetje në Drejtorinë e Inspeksionit të Komunës së Mitrovicës, ku i kemi pyetur se pasi që Drejtoria e Urbanizmit ka konfirmuar se këta “Penthouse” po ndërtohen pa leje, a e kanë evidentuar inspektorët e ndërtimit këtë shkelje të lejes nga kompania ndërtuese, si dhe çfarë masa do të ndërmerrni ndaj kompanisë “Medi Premium” për këtë mbindërtim që është në punim e sipër, ku mos intervenimi me kohë do të krijoj pasoja.
Mirëpo, deri në momentin e këtij artikulli nuk kemi marrë përgjigje nga Drejtoria e Inspeksionit për këtë mbindërtim pa leje që po e bën kompania “Medi Premium”. Pas dërgimit të pyetjeve Veriu.info ka insistuar të marrë përgjigje edhe përmes telefonit nga Drejtoria e Inspeksionit, ku dje kemi kontaktuar drejtorin e Drejtorisë, Valon Brahimi dhe Shefin e Sektorit të inspektorëve të Ndërtimit, Vehbi Ahmeti, ku që të dytë kanë thënë se për sot (e hënë) do të na kthejnë përgjigje zyrtare. Po ashtu sot kemi kontaktuar prapë Shefin e sektorit, Vehbi Ahmeti, i cili prapë ka thënë se do të përgjigjen me e-mail, përgjigje e cila nuk ka ardh deri tani.
Duke mos kthyer përgjigje, është e paqartë se a janë dalë inspektorët e ndërtimit për t’i ndaluar këto punime pa leje, ashtu siç e kanë obligim ligjor.
Ndryshe, mbindërtimet pa leje në objekte banesore kanë për pasojë mos pranimin teknik të objekteve të ndërtuara nga organet përgjegjëse komunale, ku në fund pësojnë blerësit e banesave në gjithë objektin, sepse anjë pronar banese në atë objekt nuk mund të pajiset me fletë poseduese të pronës së tij, ndërkohë që inspektorët e ndërtimin kanë për obligim rrënimin e objekteve pa leje./Veriu.info
