Në raportimet ndërkombëtare zuri vend edhe sqarimi se protesta nuk kishte të bënte me ndonjë organizim politik, por përkundër, një organizim qytetar i shoqatave të dala nga lufta.
Sheshi Skënderbe në Tiranë i mbushur me njerëz që protestojnë kundër Gjykatës Speciale
Protesta kundër Gjykatës Speciale e kësaj të premte në Tiranë, synimi i së cilës ishte ngritja e një alarmi ndërkombëtar për padrejtësi ndaj kombit shqiptar, ka marrë një mbulim të bujshëm në mediat e botës.
The Telegraph, The Washington Post e Associated Press ishin vetëm disa nga gazetat e shumta që raportuan për protestën, e cila mbushi kryeqytetin shqiptar me mijëra njerëz nga të gjitha trojet shqiptare.
“Demonstrues nga Kosova dhe vende të tjera evropiane mbushën sheshin kryesor Skënderbe në Tiranë në mbështetje të ish-udhëheqësve të arrestuar të Ushtrisë Çlirimtare të Kosovës, ose UÇK-së — një ish-grup gueril i shqiptarëve të Kosovës që udhëhoqi luftën për pavarësi. Shumë prej tyre mbanin flamuj kombëtarë shqiptarë dhe të UÇK-së, ndërsa një grup ish-luftëtarësh dhe disa të rinj ishin të veshur me uniforma të UÇK-së. Disa këndonin këngë për UÇK-në dhe lirinë.”, thuhet në artikullin e medias prestigjioze Associated Press.
Në raportimet ndërkombëtare zuri vend edhe sqarimi se protesta nuk kishte të bënte me ndonjë organizim politik, por përkundër, një organizim qytetar i shoqatave të dala nga lufta, i cili mori përkrahjen kryeministrit shqiptar Edi Rama.
Veç protestës, në artikullin e Associated Press u shqua kujtimi i shqiptarëve të vrarë në kohën e luftës bashkë me disa sqarime lidhur me situatën e tanishme të raporteve Kosovë-Serbi.
“Rreth 11,400 njerëz, kryesisht shqiptarë etnikë, vdiqën gjatë luftës , përpara se një fushatë bombardimi e NATO-s ta detyronte Serbinë të tërhiqte trupat e saj nga Kosova dhe t’ia dorëzonte kontrollin e ish-provincës së saj Kombeve të Bashkuara dhe NATO-s.
Kosova shpalli pavarësinë e saj nga Serbia në vitin 2008, e cila u njoh nga Shtetet e Bashkuara dhe pjesa më e madhe e Perëndimit, por jo nga Serbia apo aleatët e saj Rusia dhe Kina. Tensionet midis Kosovës dhe Serbisë mbeten të larta”, thuhet në artikull.
