Tri nga gazetat më të mëdha sportive në Spanjë kanë komentuar suksesin e Paris Saint-Germain në Ligën e Kampionëve, duke e lidhur atë me largimin e Kylian Mbappes nga klubi francez.
Sipas gazetës Marca, trajneri Luis Enrique ka ndryshuar rrjedhën e historisë së PSG-së. “Ndërsa largimi i Mbappes dukej se do të zbehte shkëlqimin e klubit, projekti mori hov dhe u ngrit në një nivel tjetër”, shkruan e përditshmja spanjolle.
Edhe AS vlerëson punën e teknikut spanjoll, duke theksuar se ai “arriti ta shndërrojë humbjen e një lojtari të kalibrit të Mbappes në një avantazh dhe jo në një problem”.
Ndërkohë, Mundo Deportivo ka qenë edhe më i ashpër në analizën e saj. Gazeta shkruan se Luis Enrique e nxori më të mirën nga skuadra pasi u “çlirua nga hija e Mbappes”, duke veçuar paraqitjet e Ousmane Dembeles, i cili festoi titullin e dytë radhazi në Champions League./Klankosova.tv
