Në dritën e një tjetër sulmi në veri [në kanalin e sistemit Ibër-Lepenc, në fshatin Varagë të Zubin Potokut], me – potencialisht – pasoja serioze në infrastrukturën kritike të Republikës së Kosovës, gazetari Lirim Mehmetaj vuri theksin në mundësinë e artë që, pas një tjetër mbështetje serioze ndërkombëtare, Qeveria e Kosovës ta shfrytëzojë atë që ai e quan “mundësi historike.”
Sipas Mehmetajt, nëse Qeveria dështon sërish të kapitalizojë momentin e krijuar, siç ai pretendon se ndodhi për rastin e Banjkës, kjo do të shtronte pyetje se kush mban përgjegjësinë e dështimit.
Postimi i plotë:
A do të shpërdorohet edhe ky rast si ai në Banjë?
Siç mund ta shihni, Gjermania, shteti kryesor në Bashkimin Evropian dhe shteti më i rëndësishëm në Evropë po deklaron përmes Michael Roth, se “nëse shteti serb qëndron pas sulmit në Zubin Potok, kjo shënon fundin e negociatave me BE-në”.
Në anën tjetër, kryeministri i Kosovës, Albin Kurti dhe ministri i Punëve të Brendshme, Xhelal Sveçla, kanë njoftuar publikisht se i kanë provat e mjaftueshme për të dëshmuar që ky sulm është sulm nga shteti i Serbisë.
Tash krejt çfarë duhet të bëhet është prezantimi i këtyre provave të pakontestueshme dhe të padebatueshme para institucioneve të BE-së dhe Serbia përfundimisht përjashtohet nga dialogu dhe rruga e saj evropiane.
Asnjëherë tjetër si kësaj radhe Kosova nuk e ka pasur këtë shans historik të fitores absolute në raport me Serbinë, prejse është shpallur pavarësia e Kosovës.
Nëse me rastin e Banjës nuk u arrit kurrfarë rezultati për ripozicionime në arenën ndërkombëtare, ky ngjan të jetë shansi i artë dhe vështirë i përsëritshëm.
Në pritje të Qeverisë së Kosovës për ta realizuar këtë mundësi historike.
E nëse nuk arrin ta kapitalizojë këtë moment siç nuk e kapitalizoi atë në Banjë? Çfarë atëherë? Kush i ka fajet atëherë?
