Shkruan: Lorik Lipoveci
Këto ditë kemi parë se në dy raste ( vjedhje e armës së policit brenda stacionit dhe arratisje i të ndaluarit nga një stacion tjetër) kishte dështim në procedurat e arrestimit dhe ndalimit policor!
Me ligj janë të parapara procedurat e veprimit dhe menaxhimit të këtyre rasteve, kjo së pari me Kushtetutë, Kodin Penal, Kodin e Procedurës Penale, Ligjin për Polici, akte nënligjore. Gjatë punës duhet zbatuar në përpikmëri procedurat standarte operative, gjdo lëshim apo neglizhencë sjell pasoja!
Cilat do të duhej të ishin masat në këso raste me qëllim parandalimi dhe sigurie;
Zyrtarët policor duhet të kenë të kryer së paku trajnimin bazik mbi procedurat e arrestimit dhe ndalimit;
Duhet që dhomat e ndalimit ti kenë standartet e kërkuara si hapësirën, dyert e sigurta, ndriçimin, dritaret e sigurta, të mos ketë mjete të forta të cilat mund të përdoren si armë e ftohtë, kamerat vëzhguese funksionale, planin për parandalim dhe planin për evakuim, me rëndësi të veçantë duhet të ketë kasafortë të sigurtë e të mbyllur për vendosje të sendeve qoftë të ndaluarit apo edhe zyrtarëve policor;
Duhet të plotësohen saktë formularët e ndalimit dhe procedurave;
Duhet të shenohen në libër zyrtar të veçantë çdo vizitor i cili hyn në ambientet e ndalimit;
I ndaluari duhet të kontrollohet fizikisht në cdo rast nga zyrtari policor i së njejtës gjini;
Zyrtarët policor duhet të jenë të vëmendshëm dhe serioz në procedura gjatë punës, nuk duhet lejuar mendjelehtësia, besimi dhe biseda private me të ndaluarin, nuk duhet lënë gjerat personale dhe pajisjet zyrtare në mundësi reale që të posedohen nga të ndaluarit;
I ndaluari duhet të shoqërohet dhe vëzhgohet në ambientet e punës në stacion policor apo zyrë tjetër, nëse ai/ajo ka kërkesa për higjienë, mjek apo lloj tjetër;
Preferohet që në qendra të ndalimit apo arrestimit të ketë kontroll të dyfishtë sigurie që nëse i ndaluari tenton të ikë, të përballet me dy rrathë sigurie brenda ambientit zyrtar që të parandalohet ikja e të ndaluarve.
