Ministria e Shëndetësisë ka shpenzuar mbi 100 mijë euro avance për udhëtime zyrtare vitin e kaluar. Në këto shpenzime përfshihen kabineti i ministrit, administrata, inspektoratet, Fondi i Sigurimeve Shëndetësore dhe divizioni i farmacisë.
Ministria e Shëndetësisë ka shpenzuar mbi 102 mijë euro avance nga buxheti i shtetit për udhëtime zyrtare të punëtorëve të administratës dhe kabinetit të ministrit Arben Vitia, raporton Gazeta Shneta.
Nga 102,262 euro më së paku ka shpenzuar kabineti i ministrit. Sipas të dhënave nga MSh, kabineti ka shpenzuar 3,791 Euro. Këto të dhëna janë nga muaji prill deri në dhjetor 2024. Më së shumti kanë shpenzuar ministri Vitia dhe këshilltari i tij Egzon Azemi.
Ndërkaq zyrtarët e administratës së MSh-së, Fondit të Sigurimeve Shëndetësore, Inspektoratet, farmacistë dhe në disa raste edhe mjekë të SHSKUK-së kanë shpenzuar avance në vlerë 98,471 Euro gjatë vitit 2024.
Avancet më së shumti janë shpenzuar për udhëtime në Shqipëri dhe Turqi, por edhe në vende më të largëta si në Angli, Portugali, Suedi, Kenia etj.
Në kërkesën për qasje në dokument zyrtar, është kërkuar po ashtu sqarime për cilin udhëtim për qëllimin e vizitës apo pjesëmarrjes në ngjarje, por MSh nuk i ka sqaruar këto detaje.
Në listë ka zyrtarë që kanë udhëtuar tre herë brenda muajit në vende të ndryshme.
MSh gjithashtu vitin e kaluar e ka pasur edhe një kontratë për bileta të aeroplanit. MSh e kishte shpërblyer kompaninë “As Travel Club” me tenderin për bileta të transportit ajror. Kontrata ishe në vlerë 15 mijë euro për 30 bileta brenda 12 muajve në vende të ndryshme të botës.
