Kompani pa të drejtë shitjeje dhe pa asnjë import të deklaruar rezulton megjithatë me pajisje aktive në tregun e Kosovës, të përdorura dhe të promovuara nga klinika të ndryshme. Dokumentet zyrtare dhe përgjigjet institucionale nxjerrin në pah një mospërputhje të thellë mes statusit juridik të subjektit dhe operimit të tij real në terren. Rasti ngre dyshime serioze për mënyrën e futjes së pajisjeve mjekësore në vend dhe për funksionimin e mekanizmave të kontrollit institucional në këtë sektor
Kompania me origjinë nga Shqipëria “VAANMED Z.P.K.”, e cila në Kosovë ka statusin ligjor të Zyrës së Përfaqësisë së Huaj, rezulton me zero importe në regjistrat zyrtarë të shtetit.
Megjithatë, pajisjet e saj laserike dhe mjekësore ndodhen nëpër klinika të ndryshme në Kosovë, të cilat konfirmojnë publikisht se janë furnizuar nga ky subjekt.
Dokumentet e siguruara nga Gazeta Insajderi dëshmojnë mospërputhjen mes statusit të tyre të regjistrimit, deklarimeve doganore dhe operimit real në treg.
Edhe pse operon në fushën e shëndetësisë, kompani në fjalë, në regjistrin e bizneseve në Kosovë ka vetëm një aktivitet: Hulumtimi i tregut dhe matja e opinionit publik (sondazhet).
Sipas të dhënave zyrtare mbi statusin e regjistrimit të këtij subjekti (me Numër Unik Identifikues: 812098566), kompania nuk ka zotësi juridike për të kryer aktivitete tregtare apo importi në Republikën e Kosovës.
Në përgjigjen zyrtare të kthyer me shkrim nga përfaqësuesit e tyre të autorizuar të kontabilitetit (Account Line SHPK), të datës 25 qershor 2026, konfirmohen vet kufizimet e rrepta ligjore:
“Statusi i kompanisë Vaanmed eshte ZPK (Zyre e Perfaqesis ne Kosov) dmth sipas statusit kompania nuk ka drejt te shes ose blej, e as me pak te importoj”, thuhet në përgjigjen e tyre dërguar Insajderit.
Lidhur me fushëveprimtarinë e vetme të lejueshme me ligj për këtë subjekt në Kosovë, zyra e tyre e kontabilitetit saktëson se “aktiviteti kryesor i kompanis eshte hulumtimi i tregut, dhe gjetja e blerseve potencial per paisje mjeksore”.
Kufizimi ligjor që ia ndalon kësaj kompanie importin e mallrave konfirmohet edhe nga të dhënat zyrtare të Doganës së Kosovës. E pyetur nga redaksia mbi historikun e importeve të këtij subjekti, Dogana e Kosovës ka kthyer përgjigje negative.
Zëdhënësi i Doganës, Adriatik Stavileci, ka deklaruar se “nuk është identifikuar ndonjë import ne emër te këtij subjekti”.
Përderisa institucionet shtetërore konfirmojnë se ky subjekt nuk ka futur asnjë pajisje në rrugë zyrtare në emër të biznesit në Kosovë, në terren disa klinika estetike dhe mjekësore reklamojnë haptas në rrjetet social aparaturat dhe bashkëpunimin me “Vaanmed”.
Përtej faktit që statusi i tyre si Zyrë Përfaqësie (ZPK) ua ndalon aktivitetin tregtar, sjellja e laserëve mjekësorë në Kosovë nga ky subjekt preket direkt nga Ligji Nr. 04/L-190 për Produkte dhe Pajisje Medicinale.
Sipas këtij ligji, laserët mjekësorë dhe estetikë që përdoren për trajtime të lëkurës dhe ndërhyrje kirurgjikale klasifikohen si pajisje medicinale. Ligji në fuqi përcakton rregulla strikte për çdo subjekt që dëshiron të importojë apo të vendosë në tregun e Kosovës aparatura të tilla:
Licencimi i detyrueshëm: Neni 12 i Ligjit për Produkte dhe Pajisje Medicinale specifikon se asnjë person juridik nuk mund të ushtrojë veprimtarinë e importit dhe të distribucionit me shumicë të pajisjeve medicinale pa poseduar një licencë valide të lëshuar nga Agjencia e Kosovës për Produkte dhe Pajisje Medicinale (AKPPM).
Kompania “VAANMED Z.P.K.” nuk posedon një licencë të tillë distribucioni në Kosovë, sipas listës së fundit të licencave që ka publikuar AKPPM-ja.
Legjislacioni kërkon që çdo pajisje medicinale duhet t’i nënshtrohet procesit të regjistrimit dhe vlerësimit të sigurisë në AKPPM para se të lejohet të futet në përdorim apo të reklamohet. Futja e këtyre pajisjeve jashtë këtij kontrolli përbën shkelje direkte të këtij ligji.
Në aspektin analitik juridik, nëse një kompani nuk është e licencuar nga AKPPM dhe nuk ka të drejtë importi, çdo pajisje medicinale (përfshirë laserët) që ajo ka sjellë dhe instaluar nëpër klinikat e Kosovës ngre dyshime se produkt aktualisht është i paligjshëm në treg.
Gjatë realizimit të këtij hulumtimi, Insajderi e ka mbajtur vazhdimisht të informuar AKPPM-në, derisa po komunikonte me Doganën e Kosovës, por deri tash ky institucion nuk ka pasur ndonjë reagim.
Gazeta Insajderi i ka drejtuar një shkresë zyrtare kompanisë “VAANMED Z.P.K.”, duke kërkuar sqarime mbi kodet tarifore të importit dhe licencat nga Agjencia e Kosovës për Produkte dhe Pajisje Medicinale (AKPPM). Pas mungesës së përgjigjes, fillon një shkëmbim e-mailesh ku redaksia i ka ballafaquar ata me gjetjet e Doganës, duke bërë pyetjen nëse pajisjet janë futur në formë kontrabande.
Në përgjigjen e tyre të kthyer përmes zyrës së autorizuar Account Line SHPK, ata kanë refuzuar të japin detaje specifike, duke u shprehur të fyer nga pyetjet e gazetës.
I ballafaquar me faktin se statusi i tyre ZPK ua ndalon specifikisht tregtinë dhe importin, subjekti nuk ka ofruar sqarime të mëtejshme se në emër të kujt apo në çfarë forme kanë hyrë në Kosovë pajisjet laserike që ata menaxhojnë.
Në regjistrat e biznesit shqiptare, “VAANMED” (i njohur si VAANMED Distribution) është një kompani e themeluar në Shqipëri në vitin 2017. Në tregun e Shqipërisë, kjo kompani operon si distributore e pajisjeve të teknologjisë së lartë për industrinë e mjekësisë estetike, dermatologjisë dhe kirurgjisë, duke përfaqësuar marka të njohura ndërkombëtare si brandin italian “DEKA”, si dhe “Storz Medical”, “Solta Medical”, “FotoFinder”, e të tjera.
Si themeluese dhe udhëheqëse e këtij rrjeti në Shqipëri figuron Dorina Shamo, e cila në daljet publike dhe prezantimet korporative shfaqet si imazhi kryesor i kompanisë, duke promovuar zgjerimin e aktivitetit dhe furnizimin e klinikave në tërë rajonin, përfshirë edhe Kosovën.
Megjithatë, përderisa në Shqipëri kompania gëzon status të plotë komercial, dokumentet publike tregojnë që në Kosovë kompania ka regjistruar vetëm një aktivitet: matjen e opinionit- sondazhet.
Çështja e pajisjeve mjekësore të futura në tregun e Kosovës pa kontroll të plotë institucional nuk është fenomen i izoluar. Në vite, raportet e auditimit dhe vlerësimet e institucioneve kanë evidentuar mangësi serioze në mbikëqyrjen e këtij sektori, sidomos në aspektin e licencimit, regjistrimit dhe kontrollit të cilësisë së pajisjeve.
Një nga problemet kryesore lidhet me futjen në treg të pajisjeve pa procedura të plota të verifikimit nga AKPPM, përfshirë mungesën e dokumentacionit për sigurinë, certifikimin dhe origjinën e produkteve. Kjo krijon rrezik të drejtpërdrejtë për pacientët, sidomos në sektorin e mjekësisë estetike, ku përdorimi i laserëve dhe pajisjeve invazive është në rritje.
Po ashtu, në praktikë është vërejtur një trend i përdorimit të formave alternative të operimit, si kontratat e shërbimit apo bashkëpunimit, për të anashkaluar detyrimet ligjore që lidhen me importin dhe shitjen e pajisjeve medicinale. Kjo e vështirëson gjurmimin institucional dhe dobëson mekanizmat e kontrollit.
Mungesa e koordinimit të plotë ndërmjet institucioneve – Doganës së Kosovës, AKPPM-së dhe inspektorateve shëndetësore – ka krijuar hapësirë për operime në zona gri ligjore, ku pajisjet mund të hyjnë dhe të përdoren pa u evidentuar qartë në sistem.
