Një denoncim i pazakontë për shantazh ndaj një zyrtari të Policisë së Kosovës ka ndodhur më datë 13 gusht në Stacionin policor në Mitrovicë, ku një qytetar (D.D.) është ankuar se borgjliu (N.N.) i tij i ka thënë se një zyrtar policor e ka nxitur të deklarojë rrejshëm se ka marrë para me fajde nga D.D.
D.D. ka ardhur edhe në redaksinë e Veriu.info për ta denoncuar rastin, duke treguar se personit N.N. i ka dhënë 33,580 euro borgj, të cilat ai nuk ia ka kthyer asnjëherë.
Sipas D.D., në muajin gusht N.N. i kishte thënë se një zyrtar policor i ka kërkuar që ta denoncoj D.D. për kinse dhënie të fajdes ndaj N.N., por që ky i fundit nuk ka pranuar.
Veriu.info ka dërguar pyetje në Inspektoratin Policor të Kosovës duke i pyetur se a është duke u trajtuar ky rast nga ta, dhe nëse po, çfarë masash janë marrë.
Në përgjigjen e Inspektoratit Policor për Veriu.info thuhet: “Duke ju referuar pyetjeve tuaja, gazetës online www.veriu.info, IPK konfirmon se ky rast është pranuar në IPK dhe është duke u trajtuar në koordinim me PTH (Prokurorine Themelore)- Mitrovicë, janë duke u ndermarr veprime hetimore preliminare dhe rasti është në fazën fillestare të hetimeve”.
Rrëfimi i të dëmtuarit D.D.:
Më datë 20 gusht 2024 ky person i shqetësuar ka trokitur në derën e redaksisë së Veriu.info, duke treguar detajisht se si para më shumë se dy vitesh i kishtë dhënë borgj 33,580 euro personit N.N.
Duke qenë se N.N. nuk e kishte kthyer borgjin akoma, D.D. ka vazhduar me kërkesa ndaj N.N. për t’ia kthyer paratë e marra borgj, te cilat N.N. i kishte kursime familjare nga puna që bën.
Kaluan javë, muaj e vite dhe prapë borgjliu nuk ia kthente paratë, perderisa kërkesat e D.D. vazhduan deri në fillim të muajit gusht, kur ai mbeti i tronditur nga ajo çka i kishte thënë borgjliu N.N.
“Unë i thash pse s’po m’i kthen paret, ndërsa ai më tha që nuk ka momentalisht dhe se nuk e ka ndërmend të më dëmton, sepse përndryshe ka pasur mundësi të më dëmtoj me polici. Kur e veta se qysh e si, ai më tha se një zyrtar policor i ka thënë të më denoncojë mua për kinse ato para ia kam dhënë me fajde dhe menjëherë mua do të më fusin në burg, tani i ik borgjit. Unë rastin menjëherë me 13 gusht 2024 e kam raportuar në Policinë e Kosovës për shantazh, sepse unë jam profesionist i fushës dhe nuk merrem me këto gjëra. Dikush këtu ka dashtë të më arrestojë me anë të kësaj nxitje për denoncim të rrejshëm dhe të më shkatërrojnë në familje dhe profesion. Pas denoncimit, unë besoj se policia dhe prokuroria do ta zbardh rastin dhe shantazhuesit t’i vëjë para drejtësisë”, ka thënë D.D. për Veriu.info
(Veriu.info ka emrin e denoncuesit (D.D.) dhe borgjliut (N.N.), por ka vendosur të mos i publikojë deri në përfundimin e hetimeve nga Inspektorati Policor i Kosovës)
