Kryetari i Partisë Socialdemokrate, Dardan Molliqaj me anë të një postimi ka reaguar mbi vendimin e fundit të Gjykatës Speciale ku rrëzoi mocionin e mbrojtjes në rastin e “Thaçit dhe të tjerët” për hedhjen poshtë të aktakuzës.
Molliqaj tha se kjo gjykatë tashmë ka shkaktuar shumë dëm, shkruan lajmi.net
“Gjykata tashmë ka sjellur aktgjykime dënuese për Salih Mustafën, Pjetër Shalen, Nasim Haradinajn e Hysni Gucatin. Kjo gjykatë tashmë ka shkaktuar shumë dëm. Kjo gjykatë nuk është instancë përpara të cilës duhet të dëshmohet UÇK-ja.”, tha ai ndër të tjera në postimin e tij.
Postimi i plotë:
Gjykata Speciale siç e njohim dhe dimë.
Premisat e mbrapshta të themelimit që u vazhduan me një mori shkeljesh në proces, tash po marrin epilog. Vendimi i sotem i Gjykatës Speciale, me ç’rast u hodh poshtë mocioni i mbrojtjes kundër një pjese të aktakukuzës ndaj udhëheqësve të UÇK-së, përbën vazhdimësi konsekuente të padrejtësisë së kësaj gjykate. Gjykata ka themel të mbrapshtë, dhe e ka përcjellur një proces i padrejtë.
Gjykata tashmë ka sjellur aktgjykime dënuese për Salih Mustafën, Pjetër Shalen, Nasim Haradinajn e Hysni Gucatin. Kjo gjykatë tashmë ka shkaktuar shumë dëm. Kjo gjykatë nuk është instancë përpara të cilës duhet të dëshmohet UÇK-ja. Vetë procesi dhe supozimet e tij përbëjnë padrejtësi. Ka kohë që edhe për secilin optimist indikacionet do duheshin me qenë shqetësuese. Vendimi i sotëm këtë gjë e tregon. Reagimi nuk pret, reagimi nuk duhet ta presë ditën e fundit.
