Analisti politik, Shenoll Muharremi ka reaguar ashpër ndaj qasjes së Qeverisë Kurti ndaj sektorit privat, duke e cilësuar si një “sulm të paimagjinueshëm ekonomik”, raporton GazetaBlic.
Muharremi thotë se sulmet ndaj bizneseve, veçanërisht përmes krizës me energjinë, po bëhen nga grupe të majta ekstreme brenda institucioneve me qëllim shkatërrimin e “oligarkëve”, por në fakt po rrezikohet e gjithë ekonomia dhe e ardhmja e vendit.
Sipas tij, rreth 140 mijë të punësuar dhe 50% e ekonomisë janë në rrezik, ndërsa pasojat do të jenë të gjata dhe disa të parikuperueshme.
Ai paralajmëron se Qeveria Kurti dhe LVV do të ndëshkohen politikisht, por dëmi që po i shkaktojnë Kosovës do të mbetet për një kohë të gjatë.
Postimi i plotë:
Definicioni i budallakisë është kur ti, jo vetëm i bën dëme të tjerëve, por me ato akte e dëmton edhe veten tënde. Ky është, i ashtuquajturi “ligji i tretë i budallallakut”.
Kjo po ndodh aktualisht me sulmet kundër bizneseve me energjinë. Grupet e majta ekstreme po i sulmojnë me krejt kapacitetet institucionale bizneset e forta të vendit, të cilat i punësojnë rreth 140,000 kosovarë dhe përbëjnë rreth 50% të ekonomisë.
Qëllimi është politik, me i gjunjëzu e potencialisht me i shkatërru bizneset e forta (“Oligarkët”). Një grup i vogël ekstrem, disa prej tyre informal, po testojnë idetë më të errëta ekonomike me prejardhje nga Rusia bolshevike.
Ky është sulmi më brutal dhe më i madh ndaj bizneseve, sektorit privat dhe ekonomisë së Kosovës që po organizohet dhe zbatohet nga Albin Kurti dhe LVV duke përdorë instrumentet e shtetit.
Ata po i bëjnë dëm ekonomisë dhe Kosovës, por edhe po e shkatërrojnë veten e tyre. Çmenduri, sulm direkt ndaj të ardhmes dhe një dhuratë për Serbinë.
Një Kosovë pa biznese dhe ekonomi të fortë është një Kosovë e paqëndrueshme, me shumë vrima në sigurinë kombëtare. Ky do të jetë efekti final i veprimeve që po shohim tash e sa muaj.
LVV dhe Kurti kanë me u ndëshku në zgjedhjet e ardhshme për këto veprime dhe kanë me shku në opozitë, por pasojat nga dëmet e tyre kanë me mbetë gjatë, e disa s’kanë me u rikuperu kurrë.
Krejt kjo është bërë pa përgatitjet e duhura dhe ishte shmangur me një përpjekje minimale. Por qëllimi paska qenë, jo me evituar, por me i shkatërru edhe më shumë bizneset, prodhuesit dhe ata që preken.
Një sulm dhe krim i paimagjinuar ekonomik.
