Ministri i Financave, Hekuran Murati, përmes publikimit të një statistike të Administratës Tatimore të Kosovës, në të cilën krahasohet numri i të punësuarve aktiv në muajin maj 2019 me atë të majit të vitit 2022, ka pretenduar se gjatë qeverisjes së Lëvizjes Vetëvendosje numri i të punësuarve është rritur.
Statistika e publikuar nga Murati, në rrjetin e tij social në Facebook, tregon se gjatë muajit maj të vitit 2019 kanë qenë të punësuar 318.610 qytetarë, ndërsa në të njëjtën muaj të këtij viti ky numër është rritur në 382 mijë e 861.
Pra sipas Muratit, edhe pse i njëjtë në mënyrë decidive nuk e ka thënë një gjë të tillë, përmes publikimit të këtyre shifrave të cilët shfaqin një rritje të theksuar të të punësuarve për një periudhë dy vjeçare, ka dashur të tregojë se me ardhjen në pushtet të Lëvizjes Vetëvendosje është përmirësuar dukshëm edhe numri i të punësuarve.
“Të punësuarit aktivë sipas të dhënave zyrtare nga ATK: Maj 2019: 318,610 të punësuar, Maj 2022: 382,861 të punësuar”, ka shkruar shkurt Murati.
Murati nuk është i vetmi nga qeveritarët i cili ka pretenduar rritje të numrit të të punësuarve.
I pari që ka hedhur këtë tezë në publik, ka qenë kryeministri i Kosovës, Albin Kurti, i cili padyshim është bazuar në statistika.
Megjithatë asaj që kryeministri i Kosovës, Albin Kurti, i referohet si hapje të 25 mijë vendeve të reja të punës në Kosovë gjatë mandatit të tij, nuk ështe se i besojnë njohësit e çështjeve të ekonomisë në vend.
Një gjë e tillë, sipas tyre, është formalizim i ekonomisë, por jo edhe 25 mijë vende ekskluzivisht të reja të punës, ashtu siç e paraqet kryeminstri me pompozitet.
“Nuk e besoj se janë krijuar 25 mijë vende të punës, sepse, në të njëjtën kohë, kanë mundur të largohen nga puna 30 mijë punëtorë të tjerë. Kjo për ne është shqetësuese. Pastaj, një numër i punëtorëve kanë qenë duke punuar [pa kontrata] dhe bizneset i kanë futur në sistem të pagave për shkak se Qeveria e Kosovës i ka stimuluar ato që t’i formalizsojnë punëtorët”, kishte thënë Jusuf Azemi.
