Ministri i Financave, Punës dhe Transfereve, Hekuran Murati, është pyetur lidhur me bllokimin e llogarive të Komunës së Suharekës, në konferencën e përbashkët që mbajtën me Kryeministrin Albin Kurti, ku njoftuan për rritje të pagave në sektorin publik nga janari.
Murati përsëriti se llogaritë s’janë bllokuar nga Qeveria, derisa tha se ky rast po ka tendencë të shfrytëzohet për sulme politike.
Ai tha se bllokimi i xhirollogarive është bërë nga përmbaruesit dhe se Thesari vetëm e ka njoftuar komunën për këtë, raporton Express.
“Në vazhdimësi kemi parë nga eksponentë qoftë nga Asociacioni i Komunave, qoftë edhe nga niveli lokal, që të bëhet bartja e fajita. Qeveria nuk bllokon llogari, dmth në qoftë se ka shku njoftimi prej Thesarit që po bllokohen llogaritë, është ngjashëm sikur me pretendu edhe me thanë që Thesari i ka blloku, është ngjashëm sikur me pretend që kur të vjen mesazhi që të ka dalë paga bë bankë, banka ta ka qit pagën, por në fakt punëdhënësi e ka qit, por banka vetëm të njofton. Edhe në këtë rast, Thesari është banka e komunave, që i njofton për veprimet që ndërmirren dhe nuk ka bllokim të llogarivë të tilla”, ka deklaruar Murati.
Murati tha se obligimi i komunave për kontratën kolektive nuk u është bartur nga kjo qeveri, duke shtuar se kontrata është nënshkruar nga ish-Ministri Ramë Likaj, bashkëpartiaku i Kryetarit të Suharekës, Bali Muharremaj.
Sipas tij, dëmi nga ky nënshkrim është mbi 100 milionë euro.
“As tendencë politike nuk ka këtu, e as nuk është obligim i Qeverisë që ua ka bartë, së paku kjo Qeveri nuk ua ka bartë komunave këtë obligim. Në qoftë se duam të shohim se kush e ka nënshkru, kanë qenë pikërisht qeverisjet e kaluara e madje nënshkruesi i kontratës kolektive ka qenë bashkëpartiaku i Kryetarit që dje ishte ankuar se Qeveria ka bllokuar llogaritë dhe Qeveria ua ka lënë si obligim. Pra, ka qenë pikërisht Ramë Likaj, Ministër në Qeverinë e PAN’it, në Qeverinë Haradinaj, Ministër i AAK’së që ka nënshkruar një kontratë kolektive, shkelje ligjore, pa mbulesë ligjore dhe ka fut në obligim këto komuna dhe ka shkaktuar një dëm në vlerë mbi 100 milionë euro dhe ende nuk kemi llogaridhënie për këtë çështje”, shtoi Murati.
Ndryshe, Muharremaj e ka quajtur dje të qëllimshëm bllokimin e llogarive të komunës që ai e udhëheq.
Ai ka thënë se kjo do t’i shkaktojë probleme operimit të komunës, pasi nuk po mund të i kryejnë pagesa operatorëve që kanë kryer punimet e projekteve komunale sipas kontratës.
Si pasojë, Muharremaj ka thënë se operatorët mund ta dërgojnë komunën te përmbaruesi e kosto të rritet deri në 40%.
Këtë Muharremaj e ka quajtur “lojë politike”, të Qeverisë së Kosovës ndaj komunave, shumica prej të cilave drejtohen nga partitë opozitare.
“Asnjëherë nuk kam bërë politikë, e as nuk bëjë. Jam shumë praktik. Vetëm një gjë po e them, ky vendim është në të gjitha komunat e Kosovës. Por, një buxhet që është planifikuar vitin e kaluar me 30 shtator dhe që është duke u implementuar dhe mbesin shumë projekte në gjysmë. Mundeni me ardh nesër në ora 09:30 bëhet përurimi i sallës sportive në Sopijë dhe kemi pasur me ia lëshu nesër ose pasnesër mjetet, ne nuk kemi mundësi me kry pagesë. Ka edhe shumë projekte tjera që nuk kemi mundur të krym pagesat. Shumë punë tjera në teren që mbesin në gjysmë. Kjo na bën dëm si komunë”.
