Ministri i Punëve të Brendshme, Xhelal Sveçla e ka nënshkruar sot Udhëzimin Administrativ për trajnimin dhe certifikimin e minandezësve.
Me këtë dokument, ministri Sveçla pretendon se janë adresuar të gjitha kërkesat e minatorëve të Trepçës.
“Me kërkesë të Trepçës, me qëllim të rritjes së kapaciteteve nxjerrëse të xehes në Minierën e Stan Tërgut, sot kam nënshkruar Udhëzimin Administrativ përmes së cilit mundësohet trajnimi dhe çertifikimi i minandezësve nga institucionet tona, aq sa do të jenë të nevojshëm për Trepçën”, tha ministri Sveçla, në një shkrim në rrjetet sociale.
Sveçla, i cili javën e kaluar i vizitoi minatorët grevistë të cilët janë pa paga në dy muajt e fundit, tha se Udhëzimi Administrativ është realizuar në kohë rekord.
“Falënderoj grupin punues që në afat rekord kanë punuar këtë dokument të rëndësishëm që ka adresuar në plotni kërkesat e punonjësve të Trepçës”, tha Sveçla.
Ai premtoi se si qeveri “do të ndërmarrim çdo hap të nevojshëm që Trepça të ngritet e të zhvillohet.”
