Në seancën e shqyrtimit gjyqësor në Gjykatën Themelore të Prishtinës, kundër të akuzuarve Behar Halili, Shpëtim Tahiri dhe Mentor Beqiri për tentim vrasje të rëndë dhe dëmtim të pasurisë ndaj kryeinspektorit të Punës, Nexhat Fazliu, i dëmtuari dha dëshminë e tij për sulmin e ndodhur.
Seanca vazhdoi aty ku kishte mbetur në seancën e kaluar, me pyetje ndaj dëshmitarit të dëmtuarit Nexhat Fazliu. I akuzuari Behar Halili e pyeti Fazliun nëse ishte i sigurt se ai ishte një nga kryesit e veprës. Dëshmitari u përgjigj shkurt: “Po, 100%.”
Mbrojtësi i Shpëtim Tahirit, avokati Asdren Hoxha, tha se ishte munduar të mos përsëriste pyetjet e seancave të kaluara, por parashtroi disa që lidhen me identifikimin dhe ekzistencën e veprës penale.
“Zotëri Fazliu, a mund të na përshkruani edhe njëherë rrethanat e identifikimit të sulmuesve? Ju thatë se ata mbanin maska dhe ju ishit në gjendje tronditjeje. Sa i sigurt jeni se personat që i keni identifikuar më vonë janë pikërisht ata që ju sulmuan, kur gjatë sulmit fytyrat e tyre ishin të mbuluara?”, pyeti avokati.
Fazliu u përgjigj: “Këto pyetje i kam dhënë edhe herën e kaluar, por po e përsëris: jam i sigurt 100%.”
Avokati Hoxha iu referua deklaratës së parë të dëshmitarit në polici më 29.04.2020:
“Ju keni thënë se njërit sulmues i ra maska për një moment dhe e njohët si Mehmet Kurtishi. A nënkupton kjo se personat e tjerë i kishin maskat gjatë gjithë kohës?”
Dëshmitari tha se nuk i kujtohen detajet e çdo pjese të deklaratës së dhënë para pesë vitesh, por shtoi: “Fillimisht personi që më ndaloi e kishte maskën në mjekër, ndërsa dy të tjerët, Shpëtimi dhe Mehmeti, i kishin maskat të vendosura. Gjatë goditjes, Mehmet Kurtishit i ra maska nga hunda te mjekra. Pas shfaqjes së 10–15 fotografive, i identifikova të tre.”
Në vijim, avokati Hoxha pyeti për qartësinë e shikimit gjatë sulmit. Fazliu tha se fokusi i tij në atë moment ishte mbrojtja e kokës dhe fytyrës.
“Behari ma kapi dorën, ma largoi që të mos mbrohem, në mënyrë që Shpëtimi dhe Mehmeti të më godisnin në fytyrë, mjekër dhe trup.”
I pyetur nëse e kishte njohur Shpëtim Tahirin para sulmit, Fazliu tha: “Jo, deri në ditën e sulmit nuk e kisha parë kurrë.”
Ai tregoi se gjatë sulmit nuk kishte komunikim me emra mes sulmuesve, përveç momentit kur, sipas tij, Behar Halili kishte thënë: “Bollni me,” pas së cilës ai mori goditjen e fundit para se të humbiste ndjenjat.
Fazliu deklaroi se arsyeja e sulmit lidhej me një gjobë ndaj kompanisë “MAB Shpk”, që ishte ekzekutuar përmes përmbarimit. Ai shtoi se kishte qenë i kanosur edhe më parë nga i pandehuri Mentor Beqiri gjatë një inspektimi në lokalin “Proper Pizza” në Mitrovicë.
Pjesa nga aktakuza (përmbledhje e rregulluar):
Sipas aktakuzës së ngritur më 29.04.2021, të pandehurit Behar Halili dhe Shpëtim Tahiri, të nxitur nga Mentor Beqiri, dyshohet se më 29.04.2020, rreth orës 09:05, në udhëkryqin e fshatit Godanc, Gllogoc, kanë sulmuar kryeinspektorin Nexhat Fazliu me qëllim ta privojnë nga jeta. Ata dyshohet se e kanë ndalur me veturë, e kanë nxjerrë jashtë automjetit dhe e kanë goditur me shkopinj bejsbolli, duke e ndjekur edhe pasi ai tentoi të ikte.
Fazliu ka pësuar lëndime të shumta në kokë, mjekër dhe trup. Po ashtu, të pandehurit akuzohen edhe për dëmtimin e veturës zyrtare të Inspektoratit të Punës.
Mentor Beqiri akuzohet se i ka shtyrë të pandehurit të tjerë të kryejnë veprën penale, në shenjë hakmarrjeje për një gjobë prej 10,000 euro që kompania e tij kishte marrë nga Inspektorati./BetimipërDrejtësi
Shënim: Personat e përmendur në këtë artikull konsiderohen të pafajshëm, përveç nëse fajësia e tyre vërtetohet me aktgjykim të formës së prerë.
