Në Çagllavicë para pak vitesh kishte filluar të ndërtohet lagjja luksoze “Qendresa Home” me mbi 200 shtëpi, projekt ky me investitor kompaninë “Bau Holding” të biznesmenit Bajram Gashani.
Mirëpo, sa më afër finalizimit të projektit, kanë lindur edhe mosmarrëveshjet mes banorëve, të cilët thonë se aty ‘lojë’ jokorrekte po luan edhe kompania ndërtuese, Bau Holding.
Burime të Veriu.info bëjnë të ditur se së fundmi aty është zhvilluar një proces votimi me preteksin për të shfrytëzuar hapësirat e përbashkëta të shfrytëzohet si faltore për rrjetin e banorëve që praktikojnë fenë Islame, për çka një pjesë e banorëve kanë kundërshtuar ashpër.
“Në një proces të dyshimtë votimi, gjoja për votimin brenda komunitetit të lagjes “Qendresa Home”, banorëve u është imponuar që njëra nga hapësirat e përbashkëta të shfrytëzohet si faltore. Hapësirat e përbashkëta, të destinuara për përdorim të përgjithshëm, tani janë caktuar për nevoja fetare nga komuniteti shumicë me orientim islamik, madje deri në atë masë sa është caktuar edhe një imam nga Bashkësia Islame. Në këtë komunitet islamik ka persona me histori të dyshimtë, duke ngritur pyetje të mëtejshme mbi ligjshmërinë dhe drejtësinë e këtij vendimi”, ka thënë një banor në kushte anonimiteti për Veriu.info.
Veriu.info ka provuar të kontaktojë në numrin zyrtar të lagjjes “Qendresa Home” për të kuptuar nëse ai mbështet këtë proces të ridestinimit të hapësirave të ndërtuara nga kompania, por deri në momentin e publikimit të këtij artikulli nuk kanë qenë të qasshëm.
“Kjo situatë ka krijuar tensione brenda komunitetit dhe kërkon një zgjidhje të drejtë dhe transparente për të gjithë banorët”, thotë burimi i Veriu.info që ka blerë shtëpi aty.
Veriu.info ka siguruar edhe komunikime të brendshme të procesit te votimit dhe pamje të Xhamisë në lagjjen Qendresa Home, të cilat mund të shihni më poshtë:
Veriu.info do të vazhdojë të ndjekë këtë aktivitet, pasi burimet tona tregojnë se banorët kanë paralajmëruar padi ndaj kompanisë ndërtuese, Bau Holding.
