Kryetari i Lidhjes Demokratike të Kosovës, Lumir Abdixhiku, ka kaluar nga gatishmëria për dorëheqje në një kërkesë eksplicite për procesin e nesërm. Ndonëse më parë kishte deklaruar se “më shumë se dorëheqja nuk kam çfarë të ofroj”, Abdixhiku tani po kërkon që mocioni i votëbesimit ndaj tij të realizohet përmes votimit të hapur.
Mbledhja e Kuvendit të LDK-së pritet të mbahet nesër duke filluar nga ora 12:00 në njërin prej hoteleve të kryeqytetit, ku fokusi kryesor do të jetë e ardhmja e lidershipit të partisë.
Megjithatë, kjo kërkesë e re e kryetarit aktual po konsiderohet në kundërshtim të plotë me rregulloret e brendshme të partisë.
Statuti i LDK-së specifikon qartë se mocionet e votëbesimit dhe zgjedhjet e brendshme duhet të bëhen me votim të mbyllur, si një mjet për të garantuar lirinë e shprehjes dhe votën e papenguar të delegatëve.
Sipas burimeve të brendshme të Insajderit, Abdixhiku synon të detyrojë Kuvendin që nesër të votojë fillimisht për ndryshimin e procedurës, në mënyrë që procesi i votëbesimit të jetë i hapur.
Ky zhvillim vjen pas një jave me takime intensive që strukturat e LDK-së kanë zhvilluar në të gjitha komunat e Kosovës.
Po të njëjtat burime bëjnë me dije se ekziston një mobilizim brenda strukturave, duke pohuar se shumica e anëtarëve të Kuvendit pritet të refuzojnë dorëheqjen e tij dhe t’i japin mbështetje për vazhdimin e mandatit për shkak të presionit të votimit të hapur.
