Kryeministri i Izraelit, Benjamin Netanyahu, ka uruar presidentin amerikan Donald Trump me rastin e ditëlindjes së tij, duke e cilësuar atë si një aleat të fortë dhe të guximshëm të Izraelit, në një kohë kur vendi i tij po përballet me përplasje të ashpra ushtarake me Iranin, shkruan Gazeta Sinjali.
“Gëzuar ditëlindjen, president Donald J. Trump,” tha Netanyahu në një deklaratë zyrtare.
“Ju jeni një udhëheqës i jashtëzakonshëm, i vendosur, i guximshëm, me vizion të qartë dhe veprim të qartë. Ju bëtë gjëra të mëdha për Izraelin.”
Ky urim vjen disa orë pasi Trump deklaroi se sulmet ajrore izraelite ndaj objektivave iraniane ishin “të shkëlqyera” dhe “shumë të suksesshme”. Këto komente erdhën në mes të spekulimeve për një ftohje të marrëdhënieve mes dy liderëve, pas raportimeve se SHBA-të kishin ndërmarrë përpjekje për dialog me Teheranin mbi programin e tij bërthamor.
Netanyahu e cilësoi ofensivën kundër Iranit si pjesë e një beteje globale kundër tiranisë: “Armiku ynë është armiku juaj dhe duke bërë atë që po bëjmë, po përballemi me diçka që herët a vonë do të na kërcënojë të gjithëve. Fitorja jonë do të jetë fitorja juaj.”
Në përmbyllje të deklaratës, kryeministri izraelit uroi edhe ushtrinë amerikane për 250-vjetorin e themelimit, duke e quajtur “roje të lirisë për dy shekuj e gjysmë”.
