Njerëz të qeverisë dhe të Lëvizjes Vetëvendosje po provojnë të gjejnë “fajtorë e armiq kujdestarë”, kur po ballafaqohen me probleme që duhet zgjidhur. Ata e kanë ditur se me çfarë do të përballen kur të vijnë në pushtet, andaj duhet të punojnë e jo të vajtojnë.
Imer Mushkolaj
Kur Korporata Energjetike e Kosovës (KEK) dështoi të prodhojë rrymë mjaftueshëm gjatë javës, njerëz të Lëvizjes Vetëvendosje nuk hezituan të “diagnostifikojnë” menjëherë problemin. Njëri nga tha tha se kjo ishte sabotim dhe duhej të merreshin masa ndaj sabotuesve, respektivisht nevojitej spastrim i pamëshirshëm dhe i menjëhershëm i tyre. Askush nuk mori gjë vesh se cilët ishin sabotuesit, pse paskan sabotuar dhe kundër kujt qenka drejtuar sabotimi. Akuzat për sabotim në KEK bëhen nga zyrtarë të partisë në pushtet, në situatën kur në krye të kësaj kompanie është vënë njeriu i përshtatshëm i partisë. Pse, si dhe kush paska sabotuar nuk e sqaroi kush, por pandehmat dhe akuzat mbetën.
Para se të ndërmarrë veprime për të zgjidhur problemin e mungesës së rrymës dhe, rrjedhimisht, ngrohjes qendrore në Prishtinë, njerëzit e partisë provuan të drejtojnë gishtin kah “armiku kujdestar” që fshihet diku – kësaj radhe në KEK dhe që ka për qëllim vetëm sabotimin, pengimin e “punës së mirë” të qeverisë.
Rasti i KEK’ut është i fundit nga disa syresh kur njerëz të partisë nisin gjuetinë për të gjetur fajtorë e armiq kujdestarë, ndërkohë që nuk ndërmarrin veprime e nuk marrin vendime për të zgjidhur problemet.
Njësoj ndodhi me rastin e sindikatave që po kërkojnë zbatimin e ligjit të pagave. Në vend se qeveria të dialogojë, debatojë e gjejë zgjidhje bashkë me përfaqësuesit sindikalë, “armik kujdestar” gjeti ish-koalicionin PAN. Në një përpjekje dëshpëruese për të hequr përgjegjësinë nga vetja, njerëz të qeverisë e të partisë drejtuan gishtin drejt udhëheqjes sindikale, duke i etiketuar e linçuar ata si përgjegjësit kryesorë për gjendjen në këta sektorë. Duke provuar t’i diskreditojë ata, partia e qeveria kanë për qëllim që t’i diskreditojnë sindikatat që po u udhëhiqkan nga njerëz jokompetentë të lidhur me “ish-regjimin”. Ndërkaq, të njëjtit njerëz i udhëhiqnin të njëjtat sindikata edhe kur Vetëvendosja ishte në opozitë, por atëherë ata ishin të mirë e të drejtë.
* * *
Sa ishin në opozitë njerëzve të Vetëvendosjes nuk iu interesonte nëse kishte prishje a jo, por thonin se KEDS’i duhet të ofrojë furnizim me rrymë për qytetarët. Shumë e drejtë. Por tash, një vit e pak më vonë, të njëjtit njerëz nuk mendojnë njësoj. Tash fajin për problemet me rrymë iu adresohen qeverive të kalauara. Me të drejtë, por a nuk është tash Vetëvendosja në pushtet dhe a nuk duhet të gjejë zgjidhje për problemet? A nuk e ka fuqinë si asnjë qeveri deri më tash, për të bërë çfarë të dojë? Pse duhet vazhdimisht të gjejë dikë a diçka për t’u arsyetuar për çështje që nuk mund t’i zgjidhë me kohë?
Nëse paska pasur sabotim në KEK, atëherë qeveria duhet ta bëjë të qartë për qytetarët se për çfarë bëhet fjalë. Nëse sindikatat kërkojnë zbatimin e ligjit të pagave, atëherë qeveria duhet të tregojë se çfarë do të ndodhë me të, kur pritet të sillet në Kuvend, sa do të jetë kostoja financiare e zbatimit të tij dhe a mundet të përballohet nga buxheti aktual.
Më e lehta është të drejtohet gishti drejt dikujt a diçkaje, por qeveria duhet t’i shohë ndryshe problemet dhe sfidat me të cilat ballafaqohen qytetarët.
* * *
Është e vërtetë, qeverisja e keqe ndër vite ka bërë shumë dëme dhe ka shkaktuar shumë probleme. Po ashtu, është e vërtetë se gjithçka nuk mund të zgjidhet menjëherë. Por, Vetëvendosja e ka pasur fort të qartë se cilat janë problemet me të cilat do të ballafaqohet kur të vijë në pushtet – që nga ato ekonomiko-sociale, arsimi e shëndetësia, deri te dialogu me Serbinë dhe politika e jashtme. E ka pasur të qartë se, pavarësisht çfarë ka menduar atëherë, në pushtet nuk mund të sillet si opozitë e as si ndonjë OJQ.
Pasiguria në marrjen e vendimeve dhe droja se mos nuk po veprojnë si duhet kanë bërë që plot veprime e vendime të mos merren me kohë. Ose të anulohen më pas. Për mënyrën se si kanë qeverisur ndër vite, partitë tjera kanë marrë ndëshkimin më 14 shkurt. A mjafton kjo? Sigurisht jo, nëse ka vend për hetime e ndjekje penale për vendime e veprime të jashtëligjshme. Por a duhet amnistuar qeverisja e tashme shkaku i vendimeve që janë marrë ose nuk janë marrë në të kaluarën? Qeveria e ka përgjegjësinë për të kryer punë, për të zgjidhur probleme, për t’ua lehtësuar jetën njerëzve. Të gjitha i ka në dorë dhe askush nuk mund ta pengojë as ndalojë së punuari. Përpjekja për të kërkuar përgjegjësinë tjetërkund është e kotë. “Armiqtë kujdestarë” nuk të amnistojnë gjithnjë nga përgjegjësia.
