Nga 1 nëntori i këtij viti Policia e Kosovës nuk do të lëshojë vërtetim për të kaluarën kriminale, dokument ky i kërkuar nga shumë qytetarë, raporton Gazeta Online Veriu.info.
Kështu ka njoftuar ky institucion përmes një komunikate për media, duke sqaruar se ky dokument nga 1 nëntori lëshohet nga Këshilli Gjyqësor i Kosovës, përkatësisht nga gjykata e territorit në të cilin jetojnë qytetarët kërkues.
Kjo vjen pas ndyshimeve të ligjit mbi Sistemin Qendror të Evidencës Penale, i cili shfuqizon çdo dispozitë tjetër ligjore që përcakton nxjerrjen apo lëshimin e certifikatave që ndërlidhen me evidencën penale.
Komunikata e plotë:
Policia e Kosovës, përmes kësaj komunikate zyrtare, njofton mediat dhe qytetarët se duke filluar nga data 01.11.2024, nuk do të lëshojë për palët kërkuese/qytetarët vërtetim për të kaluarën kriminale.
Ndërprerja e lëshimit të vërtetimeve i referohet Ligjit Nr. 08/L-194 mbi Sistemin Qendror të Evidencës Penale, i cili shfuqizon çdo dispozitë tjetër ligjore që përcakton nxjerrjen apo lëshimin e certifikatave që ndërlidhen me evidencën penale.
Departamenti i Evidencës Qendrore Penale pranë Këshillit Gjyqësor të Kosovës mbetet përgjegjës për t’i lëshuar këto vërtetime, prandaj palët kërkuese/qytetarët mund të aplikojnë në gjykatat që mbulojnë territorin e tyre.
