Presidentja Vjosa Osmani, në takimin e sotëm me krerët e partive politike, nënshkroi dekretin për shpërndarjen e Kuvendit të Kosovës.
Kjo lëvizje erdhi pas dështimit të mandatarit Glauk Konjufca, i cili nuk siguroi 61 vota për t’u zgjedhur kryeministër i Kosovës, por mori veç 56, numër i njëjtë që kishte siguruar edhe pararendësi i tij, Albin Kurti.
Si pasojë, do të mbahen zgjedhjet e jashtëzakonshme parlamentare më 28 dhjetor, datë kjo e shpallur nga vet e para e vendit, njofton Klankosova.tv.
Në konferencën për media, Osmani tha se në takimin me partitë politike u diskutuan datat e mundshme dhe se shumica ranë dakord për 21 dhjetorin, megjithëse sipas saj, detyrë e presidentes ishte të japë afatin më të largët të mundshëm, që sipas saj, të eliminohen disa nga sfidat e organizimit të shpejtë të zgjedhjeve.
E para e vendit po ashtu u bëri thirrje të gjitha partive që të zhvillojnë një fushatë zgjedhore me “dinjitet, respekt dhe standarde të larta politike.”
Ajo kërkoi që pas zgjedhjeve partitë të “ulen, të bisedojnë dhe ta marrin përgjegjësinë” për të krijuar institucione stabile.
Por, kundër 28 dhjetorit zyrtarisht u pati deklaruar Partia Demokratike e Kosovës, parti sipas së cilës, mbajtja e zgjedhjeve vetëm pak ditë para ndërrimit të motmoteve krijon vështirësi të mëdha për organizimin e tyre nga Komisioni Qendror i Zgjedhjeve, veçanërisht në fazën e numërimit dhe verifikimit të rezultateve.
Kundër ishin edhe krerët e partive si ata të LDK-së, poashtu edhe të AAK-së, të cilët preferuan 21 dhjetorin si datë adekuate për mbajtjen e këtyre votimeve të parakohshme.
Derisa kreu i VV-së, Albin Kurti mirëpriti vendimin e të parës së shtetit për shpalljen e zgjedhjeve më 28 dhjetor.
E menjëherë pas kumtimit të datës së zgjedhjes, dhe përfundimit të konferencës së presidentes, të njëjtës i shkuan në takim e ngarkuara me punë e Shteteve të Bashkuara të Amerikës, Anu Prattipati dhe ambasadori britanik, Jonathan Hargreaves.
