Inspektorati Policor i Kosovës, në maj të këtij viti i kishte rekomanduar Policisë së Kosovës suspendimin e katër zyrtarëve policorë të Stacionit Policor të Suharekës. Në mesin e tyre është edhe Bashkim Gashi. I njëjti tashmë është emëruar komandant i stacionit në Suharekë.
Gashi, vetëm pak muaj pas suspendimit, ia doli që të vije në krye. Ai do ta zëvendësojë ish-komandantin e stacionit në Suharekë, Afrim Syla.
Zëdhënësi i policisë për rajonin e Prizrenit, Shaqir Bytyqi, tha se toger Gashi e ka përfunduar supendimin.
“Në bazë të hierarkisë komanduese, togerit Bashkim Gashit i takon që të vazhdojë komandën e stacionit. Kjo u bë me urdhër të drejtorisë rajonale në Prizren”, tha Bytyqi.
Për çka ishte suspenduar Bashkim Gashi?
Inspektorati Policor i Kosovës, me 06.05.2025, i kishte rekomanduar Policisë së Kosovës suspendimin e katër zyrtarëve policorë të Stacionit Policor të Suharekës (përfshirë këtu një toger policor, një rreshter policor dhe dy zyrtarë policorë), shkruan Insajderi.
Të suspenduarit ishin togeri Bashkim Gashi, rreshterja Lindita Rexhepaj, zyrtari policor Qaush Hajdari, dhe zyrtari policor Fehmi Sertolli – të gjithë pjesë e Drejtorisë Rajonale të Policisë në Prizren.
Suspendimi i tyre ishte bërë pas veprimeve të brendshme disiplinore dhe në pritje të zhvillimeve të mëtejshme lidhur me hetimet.
Hetuesit e IPK-së thuhej se ishin duke ndërmarrë veprime hetimore ndaj katër zyrtarëve policorë në koordinim me Prokurorinë Themelore ne Prizren me dyshimin për veprat penale Keqpërdorimi i pozitës apo të autoritetit zyrtar dhe veprën penale mos ekzekutimi i vendimeve gjyqësore.
