Nga kuzhiniere arriti të marrë pozitën e administratores në Shërbimin Radiologjik, e nga aty baçlor i Radiologjisë.
Kjo është punonjsja e Spitalit të Vushtrrisë, Shpresa Ramiqi, e cila bëri një rrugëtim të pazakontë të ngritjes në pozitë nga viti 2017 deri në vitin 2024.
Vetëm njërën nga këto lëvizje e bëri me konkurs të brendshëm, kurse të gjitha tjerat pa konkurs.
Gazeta Online Veriu.info ka siguruar dokumentet që dëshmojnë se si zonja Ramiqi, që punonte si kuzhiniere në Spitalin e Vushtrrisë fillimisht me vendim të drejtorit të këtij institucioni, Hajrullah Saraqi, në vitin 2017 i caktohet pozita e administratores në Repartin e Radiologjisë me kohëzgjatje prej 6 muajsh, nga data 02.05.2017 deri më 02.11.2017.
Nuk kaloi shumë kohë, e njëjta mori kontratë pune me kohë të pacaktuar në shkurt të vitit 2018 pas konkursit të brendshëm duke u caktuar punëtore administrative në shërbimin radiologjik të Spitalit të Vushtrrisë, sërish nga drejtori i atëhershëm Saraqi.
Veriu.info ka siguruar kontratën për Shpresa Ramiqin e cila punësohet si punëtore administrative.
Por rrugëtimi i ngritjes në karrierë për Shpresa Ramiqin nuk përfundon këtu, pasi e njëjta bë sërish kishte bërë lëvizje brenda këtij spitali, ku fillimisht nga asistente e Radiologjisë ishte caktuar përkohësisht si teknike e Radiologjisë, sërish pa konkurs e pastaj transferohet me vendim në pozitën e baçlorit të Radiologjisë në mënyrë të përhershme.
Gazeta Online Veriu.info ka siguruar vendimin e drejtoreshës së këtij spitali, Shefkije Shatri, të datës 22.03.2024, me të cilin Shpresa Ramiqi, e caktuar përkohësisht në ushtrimin e punëve dhe detyrave si teknike e Radiologjisë, transferohet në vendin e punës Baçelor i Radiologjisë, në mënyrë të përhershme për interes të institucionit.
Gazeta ka siguruar edhe kontratën për Shpresa Ramiqin.
Veriu.info ka kontaktuar punonjsen Shpresa Ramiqin, e cila ka pranuar se fillimisht ka punuar si kuzhiniere e më pas është ngritur në pozita në bazë të konkurseve.
Ajo ka thënë se ka përfunduar studimet në fushën e Radiologjisë.
Po ashtu Gazeta ka kontaktuar edhe drejtoreshën e Spitalit, Shefkije Shatri e cila ka kërkuar që t’i dërgohen pyetjet në email, kurse deri tani nuk është përgjigjur.
