Komuna e Obiliqit ka dhënë një tender për “Shërbimet e byfes për Komunën e Obiliqit”. Kjo kontratë është fituar nga kompania D.P.H. “In – Goj”, pronar i së cilës është Kushtrim Sallova. Ky i fundit ka lidhje të afërta shoqërore me kryetarin e kësaj komune, Xhafer Gashi.
Më 07.08.2025, Komuna e Obiliqit njoftoi se kishte lidhur kontratë me D.P.H. “In – Goj” për tenderin me titull “Shërbimet e byfes për Komunën e Obiliqit”.
Sipas dokumentit të publikuar në platformën e-prokurimi, vlera e kontratës është 9,755.40 euro.
Në dosje jepen edhe detaje se çka përfshin kjo kontratë, shkruan Insajderi.
Aty janë kërkuar kafe, lëngje, qaj, ujë dhe pije të tjera.
Si Kushtrim Sallova përfitoi vazhdimisht nga Komuna e Obiliqit?
Kjo nuk është hera e parë që kompania D.P.H. “In – Goj” përfiton tenderë nga Komuna e Obiliqit.
Në shkurt të këtij viti, e njëjta kompani kishte fituar një kontratë tjetër me vlerë 9,156.30 euro, po ashtu për “Shërbimet e byfes”.
Edhe gjatë vitit të kaluar, kompania në pronësi të Sallovës kishte përfituar kontratë nga Komuna e udhëhequr nga Xhafer Gashi.
Kush fshihet prapa biznesit D.P.H. “In – Goj.
Ligjërisht, D.P.H. “In – Goj” është regjistruar me emrin “Kushtrim Sallova B.I.”.
Pronar në Agjencinë për Regjistrimin e Bizneseve figuron pikërisht Kushtrim Sallova, ndërsa “D.P.H. In – Goj” është vetëm emri tregtar i biznesit.
Miqësia e Kushtrim Sallovës dhe Xhafer Gashit
Lidhja e ngushtë mes kryetarit të komunës, Xhafer Gashi, dhe pronarit të biznesit që përfitoi kontratën publike, Kushtrim Sallova, nuk është e panjohur.
Kushtrim Sallova është një militantë i flaktë i kryetarit Xhafer Gashi.
Profilin e tij në “Facebook” e ka të mbushur me postime që i dedikohen Gashit.
Surpriza me torte
Shoqëria e e Xhafer Gashit dhe Kushtrim Sallovës, u ‘vulos’ në vitin 2019.
Kryetari atëkohë e kishte surprizuar me torte biznesmenin që tash po fiton tendere.
“Faleminderit, kryetarit dhe ekzekutivit për surpizën e ditëlindjes sime”, kishte shkruar Sallova.
Madje, një person i kishte komentuar atij në këtë postim duke shkruar: “Urime z.Sallova me gezime! Tkom than që mos ju qkoq gashve se nuk ndahesh keq :D”.
