Gazetari e komentatori politik Valon A. Syla shpalosi informacion që përflitet se ka njëlloj ujdie e gatishmëri mes Vetëvendosjes e Nismës Socialdemokrate dhe tre deputetëve të Lidhjes Demokratike të Kosovës, që kanë negociuar në mënyrë klandestine individualisht me ndërmjetës të VV, transmeton Gazeta Metro.
Të hënën Valon A. Syla në Pressing të T7 tregoi rreth të dhënave që i ka dhe skenarëve që nesër mund të ngjajnë në seancën konstituive të Kuvendit të Kosovës.
Ai shtoi se kreu i Nismës Fatmir Limaj kanë shprehur gatishmëri të bashkëpunimit të Vetëvendosje ku i ka kërkuar kryekuvendarin, ministri dhe legjislacion rreth partneritetit publiko privat.
“Sipas informacionit tonë, ka njëlloj marrëveshje në parim por jo formale mes VV, Nismës dhe tre individëve të zgjedhur deputetë të LDK’së, por nesër të gjithë do të hynë pa marrëveshje në seancë. Tjetra informatë është se këta tre deputetë janë individë që nuk i kontrollon Abdixhiku, Këta të tre kishin negociata me ndërmjetësues të Vetëvendosjes, jo direkt me Albin Kurtin.” Syla shtoi se tre deputetët e LDK që si duket i kanë rrëshqitur Abdixhikut janë njëri nga Drenica, tjetri nga Prizreni dhe njëri nga Istogu.
Ai shtoi se megjithëse ka bisedime mes këtyre fraksioneve politike, në të tre grupet ka mosbesim dhe skepticizëm mes tyre./gazetametro.net
