Faton Peci ka instituar se nuk i njeh asnjë nga aksionarët e kompanisë “LIP KS & IT” Sh.P.K., të cilës Ministria e Bujqësisë ia dha në shfrytëzim fabrikën për përpunimin e mbetjeve të kafshëve.
Në një intervistë për portalin Kallxo.com, e cila do të transmetohet të premten në mbrëmje, ministri i Bujqësisë është vënë në siklet nga pyetjet e gazetarit.
Një pjesë e shkurtër e intervistës tashmë është publikuar nga portali Kallxo.com.
Aty, Peci me pamje dhe figurë e mohon t’i ketë njohur aksionarët e kompanisë fituese të kontratës për mbetjet shtazore, përfshirë edhe kompaninë me seli në Beograd e cila ka qenë aksionare e kompanisë që tashmë ka filluar operimin në fabrikën e mbetjeve shtazore.
“A e dini prej nga janë kompanitë? Pse nuk ju tregoj askush për këtë kompani me pronar serb?”, gazetari e pyet ministrin Peci.
“Ja, se njoh”, i përgjigjet ministri. “Jo, nuk e di. Për herë të parë po e dëgjoj prej teje”.
Pas insistimit të gazetarit nëse ministri ka pasur dijeni rreth historiatit të kompanisë dhe rreth faktit se një biznes serb fshihej prapa kompanisë fituese të kontratës, Peci, dukshëm në siklet i thotë gazetarit se intervista po i ngjason me biseda të shërbimeve inteligjente.
“Këto pyetje ta krijojnë përshtypjen sikur je duke ju drejtuar një shërbimi inteligjent. 50 herë po ju them, unë nuk e njoh asnjërin prej atyre zyrtarëve”, thotë Peci.
Një kompani lokale me aksionare një biznes serb me degë në Mal të Zi, e fitoi kontratën për përpunimin e mbetjeve shtazore në Kosovë, ka zbuluar një hulumtim i portalit Kallxo.com.
Kontratën për “Funksionalizimin e objektit për përpunimin e nënprodukteve shtazore”, Ministria e Bujqësisë ia dha më 10 janar të këtij viti kompanisë “LIP KS & IT” Sh.P.K.
Kompania fituese e kontratës, sipas një hulumtimi të portalit Kallxo.com, është një biznes i themeluar nga tre aksionar: Naser Maloku, një sipërmarrës nga Kosova dhe dy kompanitë private “LIPITALIA 2000” S.P.S., me seli në Rosta të Italisë dhe “MR & MNE” D.O.O. me adresë në Podgoricë të Malit të Zi.
Të tre themeluesit e kompanisë, shtetasi kosovar dhe dy subjektet biznesore, figuronin si aksionarë në dosjen e aplikimit dorëzuar në thirrjen e Agjencisë së Ushqimit dhe Veterinarisë për kontratën.
Portali Kallxo.com ka zbuluar se “MR & MNE” D.O.O. me adresë në Podgoricë të Malit të Zi, është një kompani simotër e “MR & Co doo” me seli në Beograd të Serbisë.
Pronësia e bizneseve bie mbi shtetasin serb, Muamer Ragipoviq, bazuar në hulumtimin e portalit Kallxo.com. Ragipoviq figuron si drejtor edhe në kompaninë “MR & MNE” D.O.O. me adresë në Podgoricë të Malit të Zi, e cila kishte aksione në kompaninë kosovare që e nënshkroi kontratën me Ministrinë e Bujqësisë.
Por, një muaj pas nënshkrimit të kontratës me Ministrinë e Bujqësisë, kompania e biznesmenit serb i kishte tërhequr aksionet nga biznesi “LIP KS & IT”, i regjistruar pranë Agjencisë për Regjistrimin e Bizneseve të Kosovës (ARBK), shkruan Kallxo.com.
Kompania serbe ishte tërhequr nga pronësia mbi kompaninë më 20 shkurt.
Aksioniet e saj ishin bartur tek Naser Maloku dhe kompania “ARCHES BAU” Sh.P.K., kompani e cila më vonë do të bashkohej si aksionare e “LIP KS & IT”.
