Partitë politike nuk janë distancuar nga kandidatët që në zgjedhjet e kaluara janë përfolur për përfshirje në manipulim të votave brenda partive. PDK-ja, LDK-ja dhe LVV-ja në listat e tyre për deputetë kanë rikandiduar njerëz që pretendohet se kanë manipuluar me vota në zgjedhjet e 28 dhjetorit. Ky veprim i partive politike është kritikuar ashpër.
Procesi i rinumërimit të pjesshëm të votave të zgjedhjeve të kaluar në disa komuna kishte shpërfaqur mospërputhje të shumta, për kandidatë që përfshinin të gjitha partitë politike. Këto mospërputhje të votave në regjistrat përfundimtar, nuk ndryshonin përqindjen e rezultatit të partive politike, por kishin ndryshuar rezultatin e kandidatëve për deputet brenda subjekteve politike.
Mospërputhjet më të mëdha ishin shfaqur në Komunën e Prizrenit. Kjo kishte bërë që edhe prokuroria e shtetit të vepronte dhe të arrestonte dhjetëra komisionerë e vëzhgues të procesit zgjedhor.
Pas rinumërimit të votave për zgjedhjet e 28 dhjetorit, ish-kandidatit të PDK-së për deputet, Fetah Paçarizi, i ishin hequr 5,945 vota. Për me tepër, procesi i rinumërimit në këtë komunë kishte treguar se manipulimet kishin bërë edhe kandidatët e VV-së dhe LDK-së. Kjo kishte nxitur reagime të shumta, duke kërkuara prej partive që të distancohen nga kandidatët e përfolur për manipulim të votave.
Ndonëse PDK-ja nuk e ka kandiduar Fetah Paçarizin, dhe disa kandidatë tjerë që ishin përfolur për manipulim të votave, përsëri në listë për deputet e ka futur Nait Hasanin, i cili është përfolur për manipulim të votave në zgjedhjet e kaluara.
Madje, Hasanit i ishte arrestuar edhe djali nën dyshimin për manipulim të votave në Prizren.
Edhe Lidhja Demokratike e Kosovës ka futur në listë për deputetë të cilët ishin përfolur për manipulimit të votave në Prizren.
Njeri nga ta ishte edhe Anton Quni, i cili në zgjedhjet e 7 qershorit do të garojë me numrin 10.
Në procesin e manipulimit të votave në Prizren ishte përfshirë edhe VV-ja e Albin Kurtit. As kjo parti nuk është distancuar nga ata që kanë prekur votën e qytetarëve.
VV-ja sërish ka kandidatura për deputet kandidatin Arbër Rexhaj, të cilit në procesin e rinumërimit i ishin hequr 600 vota. Procesi i rinumërimit i kishte hequr vota edhe ish-deputetëve Ejup Maqedonci dhe Valon Hoti.
Manipulime me vota në mes të partive ishin bërë edhe në komunat tjera, cka kishte nxitur nisje të hetimeve nga organet e rendit dhe drejtësisë.
Analisti Ilir Deda ka kritikuar partitë politike që kanë kandiduar për deputetë njerëz emrat e të cilëve janë përmendur për manipulim të votave në zgjedhjet e kaluara.
Ai ka bërë me dije se PDK, LDK dhe LVV është dashur të distancohen nga këta njerëz.
Në profilin e tij në Facebook, Deda ka shkruar se këto parti nuk duhet të flasin për shtetin ligjor.
“PDK, LDK e LVV i rikandidojnë njerëzit që kanë manipulu me vota me 28 dhjetor. Aman mos flisni për shtet ligjor e drejtësi kur të kundërtën po e bëni ju vetë. Po s’keni faj ju, po ky milet që ju përcjellë e do me ja nxjerrë sytë njëri tjetrit për juve”, ka shkruar ai.
I pakënaqur me PDK-në që njerëz të tillë ka futur në listë është shprehur edhe kryetari i Prizrenit, Shqir Totaj.
Ai ka bërë me dije se duke marrë për bazë qëndrimet e kryetarit të PDK-së, dega e Prizrenit ka reflektuar duke mos e propozuar asnjë kandidat që i është përmendur emri në procesin e manipulimit të votave.
Në profilin e tij në Facebook, Totaj ka shkruar se Kryesia e PDK-së nuk e ka mbajtur premtim.
“Kemi obligim që opinionin publik ta informojmë drejt. Pas kompromitimit të procesit të numërimit të votave në zgjedhjet nacionale të Dhjetorit 2025, kryetari i PDK-së z. Bedri Hamza, në një intervistë në TV Klan Kosova, kishte kërkuar reflektim dhe përgjegjësi nga lidershipi i degës së PDK-së në Prizren dhe nga unë si kryetar i saj. Pas konsultimeve të brendshme, unë dhe kryesia e degës në Prizren kemi reflektuar me përgjegjësi politike dhe morale. Personat emrat e të cilëve u përmendën në atë proces nuk janë propozuar nga dega e PDK-së në Prizren për të qenë pjesë e listës së kandidatëve. Madje, disa prej tyre janë tërhequr publikisht nga gara deri në përfundimin e procesit ligjor”, ka shkruar ai./Nacionale/
