Paris Saint-Germaini dhe Bayern Munichu bënë histori në Ligën e Kampionëve me një gjysmëfinale të parë spektakolare.
Asnjëherë më parë nuk ishin shënuar pesë gola në 45 minutat e para të një gjysmëfinaleje të Championsit, format që ekziston që nga sezoni 1992–93.
Dhe ky nuk ishte rekordi i vetëm: goli i minutës së 65-të nga Dayot Upamecano, që e çoi rezultatin në 3–5 nga këndvështrimi i Bayernit, bëri që kjo ndeshje të përfundonte si gjysmëfinalja me më shumë gola në histori.
Harry Kane kaloi në epërsi Bayernin në minutën e 17-të në “Parc des Princes”, duke realizuar nga penalltia pasi Luis Diaz u faullua në zonë nga mbrojtësi i PSG-së, Willian Pacho.
PSG reagoi menjëherë, duke barazuar me Khvicha Kvaratskhelia, i cili shënoi me një goditje të bukur.
Më pas vendasit kaluan në avantazh rreth minutës së 30-të, kur Joao Neves shënoi me kokë pas një goditjeje nga këndi.
Ritmi i çmendur vazhdoi dhe Michael Olise barazoi në 2–2 në minutën e 41-të.
Kur dukej se pjesa e parë do të mbyllej në barazim, VAR ndërhyri dhe akordoi një penallti të diskutueshme për prekje me dorë. Ousmane Dembele shënoi nga pika e bardhë për 3–2.
Në pjesën e dytë, spektakli vazhdoi: Khvicha Kvaratskhelia realizoi për 4–2 në minutën e 56-të, ndërsa Ousmane Dembele kompletoi dopietën duke mposhtur Manuel Neuer.
Bayerni nuk u dorëzua dhe Dayot Upamecano ngushtoi rezultatin në 3–5 në minutën e 65-të. Katër minuta më vonë, Luis Diaz shënoi për 4–5.
Rekordi për gola në një gjysmëfinale të Champions tani qëndron në nëntë, ndërsa skuadra franceze arriti të ruajë epërsinë minimale deri në fund.
Ndeshja kthyese do të luhet javën e ardhshme në Mynih, ku fituesi do të përballet me Arsenalin ose Atletico Madridin në finalen e Budapestit në fund të majit.
Ndërkohë, PSG dhe Bayern mund të vendosin një rekord të ri edhe në ndeshjen e kthimit — u duhen edhe pesë gola për ta kaluar totalisht rekordin aktual.
Ky rekord mbahet nga dy gjysmëfinale që prodhuan 13 gola: në sezonin 2017/18, Liverpooli e mposhti Romën 5–2 në ndeshjen e parë, ndërsa italianët fituan 4–2 në të dytën.
Po ashtu, një total prej 13 golash u arrit edhe sezonin e kaluar mes Barcelonës dhe Interit, ku Interi kaloi tutje pas 3–3 në ndeshjen e parë dhe një fitore dramatike 4–3 pas vazhdimeve në të dytën.
