Në Gjilan po vazhdon procesi i numërimit të votave për deputetë, i cili deri më tani ka arritur në 86.61% të vendvotimeve të përpunuara.
Krahas këtij qyteti, numërimi nuk ka përfunduar as në Prishtinë dhe Prizren, ndërsa në pjesën tjetër të komunave procesi tashmë është përmbyllur.
Sipas të dhënave të Komisionit Qendror të Zgjedhjeve dhe përditësimi i fundit nga Lëvizja Vetëvendosje, Albin Kurti në qytetin e Gjilanit ka siguruar 14 mijë e 610 vota, pasuar nga Glauk Konjufca me 10 mijë e 614, kurse e treta radhitet Liza Gashi me 7 mijë e 23, Arbëreshë Kryeziu Hyseni me 6 mijë e 111 vota.
I fundit në pesëshen e VV-së në këtë qytet me numrin e votave është Luan Aliu që ka marrë 5 mijë e 778.
Nga Partia Demokratike e Kosovës, Bedri Hamza ka marrë 4 mijë e 25 vota, i dyti është Arben Mustafa me 3 mijë e 614, i treti Uran Ismaili që ka siguruar 2 mijë e 867 vota.
Nga ky subjekt politik, Përparim Gruda është i katërti sa i përket numrit të votave në këtë qytet me 2 mijë 246, kurse Arian Tahiri ka marrë 1 mijë e 949, njofton Klankosova.tv.
Në krye të listës së Lidhjes Demokratike të Kosovës me vota në Gjilan është Vjosa Osmani me 5 mijë e 121 vota, pasuar nga Lutfi Haziri me 5 mijë e 70. Në vendin e tretë renditet Gentrit Murseli që mori 4 mijë e 573 vota, kurse I katërti është Lumir Abdixhiku me 4 mijë e 493, ndërkaq Doarsa Kica Xhelili fitoi 3 mijë e 810 sosh.
Nga Aleanca për Ardhmërinë e Kosovës, Ardian Gjini ka fituar 852, Ramush Haradinaj 802, i treti është Ahmet Isufi me 749, kurse i katërti është Daut Haradinaj që mori 645 vota dhe Besnik Tahiri me 588.
