Komisioni Qendror i Zgjedhjeve, përkatësisht Qendrat Komunale të Numërimit, po vazhdojnë me numërimin e votave për kandidatët për deputet.
Deri më tani, në Komunën e Skenderajt janë numëruar mbi 70% të vendvotimeve, më saktë 73.24%.
Ajo që bie në sy është numri i ulët i votave të kandidatit të Vetëvendosjes, Fatos Geci, në qytetin e tij të lindjes.
Geci deri tani ka marrë vetëm 168 vota, duke mos arritur as 200 vota.
Ndërkohë në nivel vendi, deri më tani ka 5,233 vota.
Ky dështim elektoral duket të jetë ndikuar drejtpërdrejt nga deklaratat e tij kontroverse gjatë periudhës së fundit, të cilat shkaktuan reagime të ashpra në opinionin publik.
Reagimi i parë i madh erdhi në ditën kur u shpall vendimi përfundimtar për rastin e vrasjes së Liridona Ademajt. Në vend që të solidarizohej me drejtësinë, Geci krahasoi rastin në mënyrë të paprecedent, duke uruar që ish-krerët e Ushtrisë Çlirimtare të Kosovës (UÇK) në Hagë të merrnin “dënimin e njëjtë”, duke iu referuar burgimit të përjetshëm të Naim Murselit.
Përveç kësaj, Geci u përfshi edhe në një tjetër skandal, këtë herë duke përdorur një gjuhë seksiste dhe fyese ndaj nënkryetares së PDK-së, Vlora Çitak. Ai i drejtohej asaj publikisht: “I ke bërë 100 vjet, ke mbetur pa martuar. Gru e keqe.”
