Opinionisti Kujtim Zebica ka komentuar vendimin e ish-kryetarit të Podujevës, Agim Veliu, për të refuzuar kandidaturën për deputet në listën e LDK-së, duke thënë se ky veprim meriton respekt.
Zebica thekson se, ndonëse në të kaluarën ka qenë kritik ndaj Veliut dhe nuk është rreshtuar politikisht me të, vendimi i tij i fundit politik duhet vlerësuar.
“Agim Veliun e kam kritikuar shpesh dhe politikisht asnjëherë nuk kam qenë i rreshtuar me të. Kjo dihet publikisht. Por veprimi i tij i sotëm politik meriton respekt”, ka deklaruar Zebica.
Sipas tij, nga deklarata e Veliut kuptohet qartë se ai ka lexuar drejt ndryshimet politike dhe mënyrën se si, sipas tij, dikur ishte i padëshiruar e sot po bëhet i nevojshëm në skenën politike.
Zebica ka kritikuar edhe zhvillimet e përgjithshme politike, duke thënë se disa politikanë po veprojnë vetëm për interesa personale dhe jo mbi parime apo kauza.
“Po shohim politikanë që për interesa personale janë në gjendje ta çojnë vendin në zgjedhje në mënyrë jo kushtetuese, të ndryshojnë narracionin brenda natës dhe të bashkohen pa parime vetëm për ta shpëtuar karrierën e tyre”, ka shtuar ai.
Në fund, Zebica thekson se pavarësisht pajtimeve apo mospajtimeve politike me Agim Veliun, refuzimi i tij për t’u përfshirë në atë që ai e cilëson si lojë politike tregon karakter.
“Mund të pajtohesh ose jo me Agim Veliun politikisht, por refuzimi për t’u përdorur në një lojë të tillë politike tregon karakter. E karakteri sot po mungon shumë në politikën tonë”, përfundon Zebica./Raporto24/
