Presidentja e Kosovës, Vjosa Osmani, ka deklaruar se anëtarësimi i vendit në Interpol është një domosdoshmëri urgjente.
Duke folur në ceremoninë qendrore për 26-vjetorin e themelimit të Policisë së Kosovës, ajo vlerësoi profesionalizmin e zyrtarëve policorë, duke theksuar se Policia e Kosovës e ka vendin përkrah forcave të rendit më të respektuara në botë.
“Policët tanë janë të gatshëm që krahas garantimit të sigurisë brenda vendit, të kontribuojnë edhe në misione ndërkombëtare të sigurisë, duke e vendosur kështu Kosovën në hartën e partneritetit global”.
“Për këtë arsye mbetet domosdoshmëri që Kosova të anëtarësohet në Interpol dhe në organizatat e tjera ndërkombëtare. Sepse aty e ka vendin Policia jonë, në mesin e policive profesionale që mbrojnë paqen, rendin dhe sigurinë kudo në botë”, ka thënë Osmani.
