Presidentja e Kosovës, Vjosa Osmani, zhvilloi një takim me Sekretarin e Përgjithshëm të NATO-s, Mark Rutte, gjatë Samitit të Komunitetit Politik Evropian (EPC) në Danimarkë, ku u diskutua për bashkëpunimin në fushën e sigurisë dhe stabilitetit rajonal.
Në një postim në Facebook, presidentja Osmani e përshkroi takimin si një mundësi të rëndësishme për të forcuar marrëdhëniet mes Kosovës dhe NATO-s.
“Kënaqësi të takoja Sekretarin e Përgjithshëm të NATO-s, z. Mark Rutte, në Samitin e EPC në Danimarkë. Ky takim ishte një mundësi e shkëlqyer për të riafirmuar gatishmërinë tonë për koordinim të rregullt në mbrojtje të paqes dhe sigurisë në Kosovë dhe gjithë Ballkanin Perëndimor,” shkroi Osmani.
Presidentja theksoi se gjatë takimit u diskutua për rolin kyç që NATO luan në garantimin e stabilitetit në rajon, duke e përshkruar aleancën si një faktor vendimtar për paqen dhe sigurinë në Ballkanin Perëndimor.
“Theksova po ashtu rolin vendimtar të NATO-s në garantimin e stabilitetit rajonal, si dhe përkushtimin e Kosovës për të qenë partnere e besueshme në përballjen me sfidat e përbashkëta,” shtoi ajo.
