Drejtoria e Bujqësie në Drenas, kishte hapur një konkurs punë për “Zyrtar i Lartë i Bujqësisë”. Ajo që e dallon këtë konkurs është se pjesë u bë edhe vetë drejtoresha Anita Avdullahu. Ashtu siç edhe paralajmëroi Insajderi, ajo tashmë është punësuar. Por, që nga njëra detyrë i është dashur të heq dorë. Anita Avdullahu, tha se e ka liruar pozitën si drejtoreshë. Në anën tjetër nga opozita atje, krejt këtë proces e konsideruan absurd.
Komuna e Drenasit, në prill kishte hapur një konkurs për pozitën “Zyrtar i Lartë për Bujqësi”
Në këtë konkurs dy kandidatë i plotësuan kushtet.
Njëra ndër to ishte vetë drejtoresha e Bujqësisë në këtë Komunë, Anita Avdullahu.
Në bazë të rezultateve të publikuara, del se tashmë është vulosur punësimi i saj.
Ajo ka dal e para me 69 pikë të grumbulluara.
Avdullahu-Dvorani e pyetur nga Insajderi se cilën pozitë do ta mbajë ka treguar se e ka liruar postin prej drejtoreshë.
“Ka kohë që kam ba kërkesë me liru detyrën e drejtorit dhe e kam liruar”, tha ajo për Insajderin.
Ndërsa, asamblistja e Vetëvendosjes në komunën e Drenasit, Egzona Tërdevci, tha se punësimi i saj është paradoksi me i madh që ka ndodhur në konkurse.
“Kemi reaguar vazhdimisht lidhur me punësimet familjare e pa kritere, që janë bërë në qeverisjen e Ramiz Lladrovcit e PDK-së në Drenas, por punësimi i zonjës Avdullahu-Dvorani është paradoksi më i madh që ka ndodhur në komunën tonë kohëve të fundit, unë kam reaguar publikisht për këtë punësim dhe për ne mbetet absurde që dikush të punësohet në drejtorinë që e udhëheq vetë, kjo qasje e qeverisjes komunale po dëmton profesionistët dhe qytetarët në Drenas, të cilët kanë humbur plotësisht besimin në meritokraci dhe trajtim të barabartë nga komuna e Drenasit”, tha ajo.
