Krahas Ballkanit, sonte do të zbresin në fushën e blertë edhe dy ekipe të tjera shqiptare, që do të luajnë në garat evropiane.
Partizani i Tiranës dhe Struga do t’i zhvillojnë ndeshjet përkatëse në fazën e “play-off”-it të Ligës së Konferencës.
Skuadra nga Tirana lojën e parë do ta zhvillojë në udhëtim, respektivisht në Azerbajxhan ndaj Astanas, shkruan “Gazeta Express”.
Kjo ndeshje do të fillojë në orën 16:00 me kohën tonë lokale.
Ekipi kryeqytetas do të mundohet të sigurojë rezultat të favorshëm në udhëtim, për ta pritur më pas më i qetë ndeshjen e kthimit në Tiranë pas një jave.
Por, futbollistët dhe trajneri i Partizanit janë të vetëdijshëm se Astana është favorite.
Njëjtë si Ballkani, edhe Partizani e nisi këtë sezon në Ligën e Kampionëve, ku u eliminua shpejt për të vazhduar më pas në Ligën e Konferencës, ku i kaloi rrethin e dytë dhe të tretë kualifikues.
Ndërkohë, kampionia e Maqedonisë së Veriut, Struga po e shkruan historinë në pjesëmarrjen e saj të parë në Evropë.
Ekipi shqiptar do ta presë sot në Ohër ekipin islandez, Breidablik, në ndeshjen që do të fillojë në orën 17:00, shkruan “Gazeta Express”.
Struga po ashtu si kampione, sikur Ballkani e Partizani, luajti në rrethin e parë kualifikues të Championsit, ku u eliminua shpejt për të vazhduar më pas në UEFA Conference League, në të cilin i kaloi dy xhiro.
Shpresojmë që të tri ekipet shqiptare të nxjerrin rezultate të favorshme sonte dhe më pas ta sigurojnë kualifikimin në fazën e grupeve të Ligës së Konferencës.
