Ambasadori i Gjermanisë në Kosovë, Jorn Rohde është deklaruar për sulmin e mbrëmshëm me granata dore ndaj zyrës së postës në Zveçan.
Në reagimin e tij të bërë në platformën “BlueSky”, Rohde ka shkruar se ky veprim është i papranueshëm.
“Sulmi me granatë në postën në Zveçan është akt i papranueshëm dhune. Garantimi i sigurisë dhe mirëqenies së të gjitha komuniteteve në Kosovë është jetik, autorët duhet të përballen me drejtësinë”, tha Rohde.
Derisa, kryediplomati gjerman në Kosovë tha se përparimi në dialogun mes Kosovës dhe Serbisë është thelbësor.
“Ky incident nënvizon nevojën për përparim thelbësor në Dialogun e lehtësuar nga BE-ja”, shkroi ambasadori Rohde.
Kujtojmë se, një granatë dore ka shpërthyer mesnatën e së hënës në Zveçan, ku cak i sulmit ishin zyrat e Postës së Kosovës dhe një tjetër u shpërthye në mënyrë të kontrolluar nga ana e njësiteve adekuate të policisë.
