Pas vrasjes së dy komandantëve të lartë ushtarakë iranianë në sulmet e fundit izraelite, lideri suprem i Iranit, Ayatollah Ali Khamenei, ka ndërmarrë ndryshime të rëndësishme në strukturën ushtarake të vendit, shkruan Gazeta Sinjali.
Sipas agjencisë Associated Press (AP), televizioni shtetëror iranian ka raportuar se Khamenei ka emëruar Gjeneral Abdolrahim Mousavin si kreun e ri të Forcave të Armatosura, duke zëvendësuar Gjeneralin Mohammad Bagheri. Mousavi ka shërbyer më parë si komandant i përgjithshëm i ushtrisë iraniane.
Po ashtu, Gjeneral Mohammad Pakpour është emëruar si udhëheqës i Gardës Revolucionare Islamike, në vend të Gjeneral Hossein Salamit. Garda Revolucionare, e themeluar pas Revolucionit Islamik të vitit 1979, është një ndër institucionet më të fuqishme ushtarake dhe politike në Iran.
