Koalicioni Vetëvendosje–Guxo–Alternativa nuk arriti as sot të sigurojë shumicën e nevojshme për zgjedhjen e kryetarit të Kuvendit, ndërsa refuzimi i një pauze dhjetëminutëshe nga kryesuesi i seancës, Avni Dehari, rezultoi të ishte përcaktues – nga ajo çka kreu i PDK-së la të nënkuptohej – për fatin e kryetarit të ri të Kuvendit.
Në seancë, kandidati Hekuran Murati, i propozuar edhe seancën e kaluar, mori 55 vota pro, 46 kundër dhe 5 abstenime, rezultat i pamjaftueshëm për të marrë postin e kryeparlamentarit. Ish-ministri i Financave dështoi kështu për herë të dytë brenda pak ditësh.
Koalicioni u riorientua më pas te një emër i ri, ish-ministrja dhe deputetja Arbërie Nagavci, por edhe ajo u ndal në vetëm 55 votash pro.
Lëvizja e tretë – kandidatura e Dimal Bashës, e propozuar nga Nagavci – gjithashtu përfundoi pa sukses. Dështimi i Bashës, i cili nuk ishte funksion ekzekutiv në qeverinë Kurti 2, shkaktoi reagime të ndryshme në opinion.
Partia Demokratike e Kosovës u akuzua se nuk mbajti fjalën se deputetët e kësaj partie do të votojnë për kandidatin e VV-së për kryetar kuvendi vetëm ai apo ajo nuk ka qenë ministër apo ministre e Qeverisë Kurti.
Por, kjo parti e arsyetoi abstenimin ndaj Bashës me refuzimin e kërkesës për një pauzë 10‑minutëshe konsultimi nga kryesuesi Avni Dehari.
Sipas kryetarit Memli Krasniqi, kërkesa u shpërfill nga kryesuesi i seancës, Avni Dehari. “Abelard Tahiri kërkoi një pauzë 10 minutëshe nga kryesuesi i seancës para se të ndodhte ky votim, por edhe këtë herë u injoruam. U munduam ta kemi edhe miratimin e kësaj kërkese, ai e shpërfilli duke mos na e mundësuar fare”.
”Këta janë deputetët e Lëvizjes Vetëvendosje. Sa i përket deputetëve këta janë njerëz që kanë zgjedhë Albin Kurti. 10 minuta mos me t’i miratu së pari është disrespekt”.
Nënkryetarja e PDK-së, Vlora Çitaku, akuzoi Deharin për “arbitraritet” dhe “mungesë respekti institucional”.
Ajo publikoi edhe një video, ku thotë se vërtetohet jo vetëm që kryesuesi e ka dëgjuar kërkesën, por edhe përdorimi i një gjuhe të papranueshme ndaj deputetes së re, Sala Jashari. “Veç rri ti, veç rri. Edhe unë po i dëgjoj, sikur ti që i dëgjon,” dëgjohet Dehari në videon e shpërndarë nga Çitaku.
“Kryesuesi i Kuvendit, ashtu siç ka vepruar tash e gati pesë muaj, edhe sot udhëhoqi me arbitraritet – duke na e mohuar kërkesën krejtësisht legjitime për një konsultim 10-minutësh, para votimit për deputetin Dimal Basha – i cili edhe vetë dukej i befasuar nga ky propozim. Si pasojë, ne nuk votuam kundër, por abstenuam.” – shkroi ndër të tjera Çitaku.
Në anën tjetër, Lidhja Demokratike e Kosovës ruajti qëndrimin. Deputeti Besian Mustafa rikujtoi se “qëndrimi i LDK-së ka qenë dhe mbetet konsistent”: partia nuk do të mbështesë asnjë kandidat të ndonjë subjekti tjetër në mungesë të një marrëveshjeje politike paraprake.
Një gjë të tillë e rikonfirmoi edhe kryetari i kësaj partie, Lumir Abdixhiku, i cili tha se se partia e tij ka qëndruar në të njëjtin kurs politik prej fillimit, duke e bazuar çdo vendim mbi parime e konsistencë.
“Qëndrimet e LDK-së janë parimore dhe konsistente që nga dita e parë. Sepse janë të tilla, edhe po qëndrojnë mbi lojërat patetike politike. Pa marrëveshje nuk mund të ketë shumicë. Pa marrëveshje nuk mund të ketë votë – për askend dhe asnjërin! Marrëveshje uniteti ofruam, nuk e deshën. Tani le të bartin përgjegjësinë e bllokimit. Jemi të bindur gjithsesi, se duke sharë e ofenduar në vazhdimësi, nuk do të ndryshojnë mendimin e asnjërit.” – shkroi ai.
