Deputeti i Lëvizjes Vetëvendosje, si dhe njëri nga kryetarët e Listës Guxo, ka drejtuar akuza të rënda ndaj Lidhjes Demokratike të Kosovës duke e cilësuar si një “shoqëri aksionare”. Para më pak se dy javëve, ai deklaronte se kjo parti nga vet kryeministri në largim, Albin Kurti, u pa si një prej opsioneve për qeveri më stabile.
Derisa po arrinte në Kuvendin e Kosovës, Peci para gazetarëve pati kritika e akuza për LDK-në, duke thënë se ka ndryshuar nga koha kur ai ishte pjesë e kësaj partie.
“LDK kam përshtypjen që është shndërru në një shoqëri aksionare, sikur është e privatizume dhe varet se çka thonë aksionarët. Duke qenë se kam qenë një kohë të gjatë pjesë e LDK-së, ajo në të cilën është angazhu LDK në të kaluarën, nuk ka të bëj me këtë sot.
Imagjinoni nëse ndjeket ky diskurs i LDK-së, ku refuzohet zhbllokimi i Kuvendit dhe institucioneve” – tha ai, transmeton Nacionale.
Megjithatë, para dy javësh gjatë një paraqitje të tij televizive, ai deklaronte se këtë parti e kishin parë si opsion për qeveri stabile.
Me Partinë Demokratike të Kosovës nërkaq, thoshte se “dallimet i kanë më të mëdha”.
“Është çështje si e vlerëson kryeministri Kurti, ndajmë mendime ndonjëherë s’pajtohemi, por në fund marrim një konsensus
Është vlerësu se është një prej opsioneve për një qeveri më afatgjatë dhe stabile, dhe është diskutu opsioni për ftesë. Do të ishte qeveri stabile, por ata kanë refuzu.
Me PDK-në dallimet janë më të mëdha, por në anën tjetër është zgjedhja e kryeministrit” – shprehej Peci.
Theksojmë se edhe sot është ndërprerë seanca e Kuvendit. Avni Dehari i VV-së kërkoi votim të fshehtë, të cilin e refuzoi opozita.
Kështu, ai kërkoi nga deputetët që të votojnë me “votime fizike”.
“Deri sot kemi pasur disa tentime, por pa prodhuar rezultat në zgjedhjen e kryesisë. Marrë parasysh aktgjykimin e Gjykatës Kushtetuese të vitit 2014, për zgjedhjen e kryetarit të Kuvendit, ku thuhet se votimi mund të jetë i formës së hapur, i fshehtë, apo çfarëdo forme tjetër, dhe bazuar në rregulloren e Kuvendit, me qellim të hapjes rrugë për zhbllokimin e procesit, konsideroj që forma e duhur që mund të hapë rrugën për konstituimit është votimi në mënryë të fshehtë për votime fizike.
E ftoj administratën që t’i bëjë përgatitjet e nevojshme” – tha ai.
Opozita e deritanishme e konsideroi këtë si një shkelje kushtetuese dhe shkelje e rregullores për punën e Kuvendit të Kosovës.
