Një ushtar i FSK-së, sipas burimeve të “ATV-së”, nuk është kthyer nga një trajnim zyrtar në Shtetet e Bashkuara të Amerikës.
Sipas raportimeve, i njëjti ka vendosur të qëndrojë ilegalisht tek familjarët e tij në Amerikë, gjë që e konfirmon edhe eksperti i sigurisë Bedri Elezi për “Ora Shtatë”, transmeton Klankosova.tv.
E sipas burimeve të ATV-së, ushtarit kosovar iu është kthyer vetëm një uniformë nga trajnimi. Dyshohet se vendimi i tij lidhet me kushtet e vështira ekonomike dhe dëshirën për një jetë më të mirë në ShBA.
Lidhur me këtë, eksperti i sigurisë, Arben Dashevci thotë se lëshimi i FSK-së nga ushtarët e saj, është pasqyrë e keqe, e madje për keqardhje.
“Nëse e shikojmë në aspektin e përgjithshëm shumë ushtarë e kanë lëshuar Forcën e Sigurisë së Kosovës dhe është për të ardhur keq, sepse kanë qenë edhe ushtarë të njësive elite, gjithashtu edhe të policisë, gjithashtu dhe të agjencioneve të tjera. Kjo është për të ardhur keq sepse ti po investon në ata ushtarë, apo në ata organizma të sigurisë, dhe ta lëshojë ty një ushtar elitë, ai kushton, dhe kush humb këtu, humb shteti në përgjithësi. Është pasqyrë e keqe”, tha Dashevci.
