Partnerët e Koalicionit Lista për Familjen, i cili në zgjedhjet e fundit ka marrë rreth 20 mijë vota është përçarë.
Koalicionet e mundshme të këtij subjekti politik për zgjedhjet e 28 dhjetorit duket se kanë prishur unitetin e kësaj liste.
Ferid Agani, njeri nga partneret e këtij koalicioni ka kritikuar Eman Rrahmanin, i cili i ka prirë këtij kaolini në zgjedhjet e shkurtit.
Në profilin e tij në “Facebook”, ai ka shkruar se votat e këtij koalicionin nuk janë pronë personale e askujt.
“Për këtë arsye, ne deklarojmë prerazi: 1. Rezultati i Koalicionit për Familje është 100% kapital kolektiv dhe përpjekja për ta shitur si “pronë personale” është devijim i rëndë politik dhe etik. 2. Kushdo që pretendon se 20 000 votat janë “vota personale”, e bën këtë në kundërshtim me të vërtetën, me marrëveshjen politike dhe me çdo standard minimal të korrektësisë. 3. Të gjithë kanë të drejtë të largohen, të ndryshojnë orientim apo të ndërtojnë projekte të reja, por askush, absolutisht askush, nuk ka të drejtë të përvetësojë rezultatin e një projekti të përbashkët për interesa të ngushta personale. 4. Çdo përdorim i emrit “Koalicioni për Familje” apo ” Lista për Familje” pas skadimit të marrëveshjes më 9 shkurt 2024 është i paautorizuar, i pavlefshëm dhe përbën mashtrim politik ndaj opinionit publik”, ka shkruar ai.
