Sot është shembur dheu në një vendpunishte në lagjen Velania në Prishtinë.
Lajmin për Express e ka konfirmuar zëvendëskomandanti i Zjarrfikësve, Abdusamed Shkodra, i cili tha se s’ka persona të lënduar.
Ai tha se katër vetura kanë qenë të rrezikuara, mirëpo dy kanë qenë më shumë. Tri prej tyre Shkodra tha se janë larguar ndërsa automjeti i katërt ndodhet në vend më të sigurt dhe pritet të largohet.
“Dy prej veturave i kanë pasur rrotat në ajër”, tha Shkodra.
“Informatën e kemi pranuar rreth orës 12:09. Menjëherë i jemi përgjigjur dhe kemi dalë në vendin e ngjarjes”, tha ai.
Kujtojmë se dje në Veternik u shemb dheu në një vendpunishte tjetër, ku një person vdiq e një tjetër u lëndua. Për këtë është arrestuar një i dyshuar dhe rasti po hetohet.
