Shkruan: Kimete Berisha
– Unë e kam refuzuar një takim me Albin Kurtin, pasi që kam pranuar ta takoj, ama unë jam ndryshe, mua më ka hije.
– Në çastin e fundit i kam thënë ndërmjetësueses ‘e kam nanën smutë’, arsye e prapambetur kjo, e di, por kurrë s’kam pasur tjetër arsye për t’u nxjerr nga situata.
– Unë e refuzova, jo nga mosrespekti, por, sepse në atë parti veç Albinin e marr seriozisht.
Sigurisht kjo më bën të dukem mendjemadhe, por ja që jam.
Çfarë po ndodh?
– Janë nervozuar gjindja pse Memli ka pranuar të takohet me Albinin?
– E pse janë nervozuar?
Pse qenka keq të takohesh me Albin Kurtin!
– Avdullah Hoti u mërzit edhe më shumë se Lumiri.
Lumiri nuk pranon të takohet me Memlin, por pretendon se duhet ta mësojë Memlin se më kë duhet të takohet ai.
– Sikur ta kishte takuar Lumiri (e ardhmja e odave tona), ndoshta Memli s’do të takohej me Albinin….se me dikë duhet të takohet Memli.
– Avdullah Hoti u nervozua më së shumti: Atij më i keq po i duket takimi i Memlit me Albinin sesa vetja kur takohej me Vuçiqin dhe kur Vuçiqi e pyeste ‘a di ti serbisht’, e ky i përgjigjej si nxënës ‘pomalo’.
– Se demek nëse di pak serbisht je ‘patriot’ në krahasim me atë që e di serbishtën ujë, si unë.
– Para se Albin Kurti të bëhej ‘armiku’ i PDK-së, ‘armiku’ më i madh dhe armiku jetësor i PDK-së ka qenë LDK (me apo pa arsye, s’më intereson).
– Të gjitha akuzat që e kanë portretizuar PDK-në si ‘kriminale’ dhe monstruoze janë bërë nga LDK-ja.
– Pra, PDK i është nënshtruar një gjyqi publik 20 e kusur vjeçar dhe po vazhdon të gjykohet edhe sot lufta për liri, shkaku se LDK kurrë pa pushuar ka thënë: ‘PDK janë kriminelë’.
– Vetëvendosja është e vonshme, s’ka as akuza të vetat.
Vetëvendosja e kanë huazuar propagandën e LDK-së për ta bërë PDK-në të duket ‘lugat’.
– Dhe, kjo nuk e ka penguar Hashim Thaçin të merret vesh me Isa Mustafën, anipse nga akuzat e LDK-së nuk është liruar as sot e kësaj dite.
– Para se Memli Krasniqi të hante peshk me Albin Kurtin….s’ka lënë kush pa u takuar me kënd.
Dhe, Isa Mustafa ka bërë qeveri me Listën Serbe!
– Ani çka?
Vakti e ha kashtën.
– Ama tash po çuditen që Memli është takuar me Albinin.
A është e mundur?!
LDK u bë xheloze se rrezik Albini po ua merr Memlin, me të cilin, që thashë, as nuk pranojnë të takohen.
– Është gjest i prapambetur ta refuzosh ftesën për paqe dhe për marrëveshje!
Por është mençuri të kuptosh se pse Albin Kurti ka nevojë për PDK-në?
– Sepse e ka provuar LDK-në.
LDK është ‘ishe’ e Albin Kurtit!
– Pse LDK ia lejon vetes të kaluarën ‘e pandershme’ kur ka bërë qeveri me Albin Kurtin, e PDK-së nuk ia lejon të bëhet ‘e pandershme’ në të ardhmën, duke u takuar me Albin Kurtin.
– Pse veç PDK u dashka të jetë ‘e ndershme’ e të mos e provojë me Albin Kurtin!
– Albin Kurti është i ‘madh’ në numër, por PDK i duket e madhe në vepra.
– Albin Kurti ka treguar se ka nevojë për PDK-në.
Që është krejt normale.
Atij i pëlqen PDK se i duken trima, prandaj dëshiron ta ndajë rrezikun me trima.
– Të gjithë të hidhëruarit nga ky takim, duhet ta dinë se nuk janë më të mirë se Albin Kurti.
Ama, aspak. As nuk i afrohen.
– Këtu gara është se cili është më i keq se tjetri, se mirë e mbarë s’kemi parë ende.
– Mua do të më pëlqente që Vetëvedosja të bëhej bashkë me PDK-në!
Pse jo?
Ali hoxha – hoxhë Alia!
P.S. Para hundëve të Memlit përmbi tavolinën e takimit ishin vendosur një tufë lule të bardha, që sigurisht të dielën në hotel i ka harruar ndonjë nuse e dalldisur!
Abelardit veç çka s’i kish hyrë gjyli i bardhë në gojë se saksinë me lule e kish edhe më afër…
Dukej i shkrirë i tëri…Abelardi.
– E, që peshku i madh e ha të voglin, askush nuk ka faj.
