Policia e Kosovës ka arrestuar një person sot në Mitrovicë pasi i njëjti iu kishte ofruar ryshfet për të mos e dënuar, raporton Gazeta Online Veriu.info.
Policia kishte ndaluar shoferin për tejkalim të shpejtësisë, dhe derisa po i shqiptohej gjoba i njëjti u ofroi atyre një kartmonedhë prej 20 eurosh.
“I dyshuari është arrestuar dhe pas intervistimit, me urdhër të Prokurorit kompetent i është caktuar masa e ndalimit prej 48 orësh. Ndaj të dyshuarit është iniciuar rast për veprën penale- Dhënia e ryshfetit.” – thuhet në njoftim.
Njoftimi i plotë i Policisë:
Arrestohet një person i dyshuar për dhënie ryshfeti
Mitrovicë e Jugut, 08 gusht 2026
Njësia policore, gjatë mbajtjes së një pike kontrolli, ka ndaluar një automjet, drejtuesi i të cilit kishte tejkaluar shpejtësinë e lejuar.
Derisa zyrtarët policorë ishin duke shqiptuar gjobën për kundërvajtjen e trafikut, i dyshuari, mashkull/shtetas i Republikës së Serbisë, u ka ofruar zyrtarëve policorë një kartëmonedhë prej 20 eurosh, me qëllim që të mos i shqiptohej gjoba.
I dyshuari është arrestuar dhe pas intervistimit, me urdhër të Prokurorit kompetent i është caktuar masa e ndalimit prej 48 orësh. Ndaj të dyshuarit është iniciuar rast për veprën penale- Dhënia e ryshfetit.
Policia mbetet e përkushtuar në zbatimin profesional dhe të paanshëm të autorizimeve si dhe në ndërmarrjen e veprimeve ndaj çdo veprimi që cenon integritetin e zyrtarëve policorë dhe zbatimin e ligjit.
