Xhevdet Pozhari, analist në ATV, ka shkruar një status relativisht të gjatë, ku ka komentuar marrëdhënies në mes kryeministrit Albin Kurti dhe presidentes Vjosa Osmani.
Në shkrimin e tij, Pozhari ka bërë një analizë të raporteve tashmë 4-vjeçare të Kurtit e Osmanit.
“Dardha ka bisht! E bishti i dardhës në raportet Kurti – Osmani është ajo që kanë pritur të gjithë – Asociacioni apo Zajednica, siç e quante dikur Vetëvendosja” – ka shkruar ai.
Ndërsa kur komentoi çarjen mes këtyre dy liderëve, Pozhari shkroi se “dardha e nxorri bishtin”.
“Kurti sulmohej në pikën e tij më të fortë – ndryshimi i gjendjes faktike në veri. Nuk vonoi shumë, me një opozitë thuajse të dorëzuar, Amerika e vendosi “thundrën e hekurt”. Asociacioni!
Viti 2024. Dardha e nxorri bishtin. Dallimet “e vogla” filluan të bëheshin gjithmonë e më të dukshme. Aleatët e dikurshëm, pas takimit në kryqëzim, filluan të ecin natyeshëm në rrugë të ndara. Ashtu siç kishin ecur gjatë gjithë udhëtimit politik para se të takoheshin” – ka shkruar ai.
Postimi:
Dardha ka bisht! E bishti i dardhës në raportet Kurti – Osmani është ajo që kanë pritur të gjithë – Asociacioni apo Zajednica, siç e quante dikur Vetëvendosja.
Kurti si opozitar e kishte kauzën më të rëndësishme refuzimin e themelimit të Zajednicës, atë që Vjosa Osmani e kishte përkrahur kur ishte pjesë e LDK-së. Të dy ecën në drejtime të ndryshme, por rrugët e tyre do të kryqëzoheshin. Fillimisht si kundërshtarë për postin e kryeministrit. LDK e kandidoi Vjosa Osmanin për kryeministre pasi që e kuptoi se gaboi kur e vuri në fund të listës në shenjë hakmarrjeje si ndëshkim për mosbindje ndaj kryetarit të partisë asokohe, Isa Mustafa. Ajo u fuqizua me votë. Rrjedhimisht, kundërshtimi i saj ndaj koalicionit LDK – PDK u shpagua. Me një diferencë të vogël e humbi garën kundër Albin Kurtit. Ndodhi koalicioni që deri në atë kohë konsiderohej i pamundur, LDK – VV. Panatyrshmëria e këtij koalicioni do të dilte në pah edhe më shumë në kohë pandemie.
LDK nuk ishte mbushur mend, bëri dy gabime të njëpasnjëshme – e rrëzoi Qeverinë në kohë pandemie dhe më vonë e përjashtoi Vjosa Osmanin nga partia.
Dallimet konceptuale midis Vjosa Osmanit dhe Albin Kurtit tashmë kishin mbetur në hijen e luftës politike “gjenerata e re” kundër “gjeneratës së vjetër”.
“Viti 2020 ka treguar se Kosova ka nevojë për kryeministër të ri por dhe presidente të re”, me këtë fjali u prezantua koalicioni i ardhshëm midis dy kundërshtarëve të deridjeshëm. Askush më nuk e vinte në diskutim fitoren e tyre, askush nuk pyeste më për Zajednicën. E vetmja pyetje ishte nëse ata do ta arrinin synimin – të merrnin krejt pushtetin. Krejt dhe Drejt!
Me 14 shkurt, 2021, votuesit u përgjigjen me “PO”. Isa Mustafa p*rdhi në shishe. E, Hashim Thaçi ra në gropën që ia bëri vetes! E reja triumfoi mbi të vjetrën. Për Kurtin dhe Osmanin kishin votuar edhe ata që ishin kundër Asociacionit, edhe ata që ishin “pro”. Opozita kishte mbetur si pulë pa kry! Kjo gjendje e tyre do të vazhdonte edhe 3 vite gjatë qeverisjes së koalicionit të ri. Kurti sulmohej në pikën e tij më të fortë – ndryshimi i gjendjes faktike në veri. Nuk vonoi shumë, me një opozitë thuajse të dorëzuar, Amerika e vendosi “thundrën e hekurt”. Asociacioni!
Viti 2024. Dardha e nxorri bishtin. Dallimet “e vogla” filluan të bëheshin gjithmonë e më të dukshme. Aleatët e dikurshëm, pas takimit në kryqëzim, filluan të ecin natyeshëm në rrugë të ndara. Ashtu siç kishin ecur gjatë gjithë udhëtimit politik para se të takoheshin.
Është koha kur opozita do të heshtë që ta sheh furtunën midis dy udhëheqësve shtetërorë që ia mundësuan pushtetet e ndara njëri – tjetrit. Do të presin momentin që ta godasin pamëshirshëm atë që do të bie dhe të rreshtohen me fituesin me të cilin do të bashkëqeverisin, së paku deri në betejën e radhës – zgjedhja e Presidentit!
