Presidentja e Kosovës, Vjosa Osmani, ka pritur sot ambasadoren e re të El Salvadorit në Kosovë, Rhina Bardi, e cila i dorëzoi letrat kredenciale.
Në këtë takim, Presidentja Osmani e uroi Ambasadoren Bardi për detyrën e saj të re dhe shprehu mirënjohjen për mbështetjen e vazhdueshme të El Salvadorit ndaj Kosovës.
Ajo kujtoi vizitën e saj në këtë shtet gjatë inaugurimit presidencial të vitit të kaluar, duke vlerësuar progresin e shënuar nga El Salvadori në fusha të ndryshme.
“Duke vlerësuar udhëheqjen e Presidentit Nayib Bukele, Presidentja Osmani nënvizoi përparimin e jashtëzakonshëm të El Salvadorit në siguri, rritje ekonomike dhe zhvillim të sektorit të turizmit. Ajo theksoi se si Kosova dhe El Salvadori janë renditur ndër vendet më të sigurta në botë, duke rritur kështu atraktivitetin për investime dhe turizëm.
Në këtë drejtim, u identifikuan mundësi për bashkëpunim në sektorët e teknologjisë së informacionit, inovacionit, ekonomisë, mbrojtjes, arsimit dhe turizmit. Presidentja Osmani theksoi rëndësinë e promovimit të investimeve të sektorit privat, nxitjes së ndërmarrësisë dhe organizimit të forumeve ekonomike për t`i afruar bizneset dhe institucionet e të dy shteteve.” – thuhet mes tjerash në njoftim.
