Komuna e Vushtrrisë në fund të muajit korrik 2024 ka shpërblyer me tender për furnizim me dru për ngrohje në vlerë prej 940 mijë euro grupin e operatorëve ekonomik “Milaim Bejta B.I. & N.T.P. Agoniti”.
Grupi i operatorëve ekonomik “Milaim Bejta B.I. & N.T.P. Agoniti” do të furnizojnë komunën e Vushtrrisë me 11,400 metra dru kundrejt vlerës së pagesës prej 940 mijë e 500 euro, që i bie se një metër dru komunës së Vushtrrisë do t’i kushtoj 82.5 euro, raporton Veriu.info.
Në këtë tender që ishte paraparë si kriter çmimi më i ulët, oferta kanë dërguar gjashtë kompani (grupe të operatorëve), ku katër prej tyre kanë ofertuar me çmim më të lirë se fituesi i tenderit. Grupi i Operatorëve Ekonomik “N.T.Sh. BEDI COM & N.T.Sh. NAZI TRAVEL” kishte ofertuar me 541,158 (47.47 euro për metër) euro për furnizim me këto dru, apo kthyer në çmim krahasues me 399,342 euro më lirë se sa kompania fituese.
Por në fund drejtori i Drejtorisë së Prokurimit në komunën e Vushtrrisë, Ilmi Azemi kishte nënshkruar njoftimin mbi vendimin e autoritetit kontraktues (komuna e Vushtrrisë) për shpalljen fitues të “Milaim Bejta B.I. & N.T.P. Agoniti” me vlerë ofertuese prej 940 mijë e 500 euro.
Veriu.info ka hulumtuar edhe në dosjet e tenderëve të komunave tjera të shpallura këtë vit, ku ka gjetur se komuna e Gjakovës ka blerë dru për ngrohje me çmim drastikisht më të lirë se sa komuna e Vushtrrisë.
Në tenderin e shpallura nga komuna e Gjakovës për furnizim me 500 metra dru, fitues është shpallur kompania me çmimin me të lirë prej 18 mijë e 900 euro nga gjitha kompanitë që kanë ofertuar. Pra, komuna e Gjakovës sipas kësaj përllogaritje i bie që do të paguaj 36 euro për një metër dru.
Bartës i grupit të operatorëve fitues te tenderit me dru është “Milaim Bejta B.I.” me pronar Milaim Bejta, biznes që mban emrin tregtar “Bushgegu 89”.
Veriu.info ka hulumtuar për historikun e kompanisë në fjalë dhe ka gjetur se pronari i saj Milaim Bejta është i dënuar nga Gjykata Themelore e Gjakovës për veprën penale “falsifikim i dokumenteve”, pasi që ai kishte ndryshuar një dokument (vërtetim) të lëshuar nga Agjencia Pyjore e Kosovës në emër të ndërmarrjes N.T.P “Bushgegu” (v.j. Milaim Bejta B.I.) me qëllim të konkurrimit në një tender për furnizimin me dru për nevoja të Komunës së Gjakovës. (https://betimiperdrejtesi.com/denohet-me-300-euro-gjobe-per-falsifikim-dokumentesh/).
Pra, në këtë tender nga komuna e Vushtrrisë kërkohen dru ahu ose burgu, pa specifikuar se nga sa metra kërkohen të secilit lloj, kur dihet se burgu dhe ahu kanë dallim të madh në çmim, gjë që lë mundësi për manipunim, gjegjësisht bërje të kërkesës për dru më të lira apo dru që i përshtatet operatorit ekonomik për t’i sjellë./Veriu.info
