Prokuroria Publike për Krimin e Organizuar në Serbi ka hapur dy raste bazuar në kallëzimet penale të avokatit Ivan Ninić, të cilat lidhen me dyshimet për kryerjen e veprave penale kundër të drejtave zgjedhore.
Sipas njoftimit të Prokurorisë, veprimet janë ndërmarrë në përputhje me udhëzimin e përgjithshëm të detyrueshëm të Zyrës së Prokurorit të Lartë Publik, të datës 20 tetor 2026, i cili përcakton veprimet e prokurorëve në hetimet paraprake dhe procedurat penale për veprat që lidhen me të drejtat zgjedhore.
Kallëzimi i parë penal është paraqitur ndaj drejtorit të Agjencisë së Sigurisë dhe Informacionit (BIA), Vladimir Orliq, dhe disa punonjësve të kësaj agjencie, nën dyshimet për shpërdorim të detyrës zyrtare, shkelje të së drejtës së votës dhe shtrëngim.
Më 4 nëntor, Prokuroria i ka kërkuar Ministrisë së Punëve të Brendshme, përkatësisht Shërbimit për Luftimin e Krimit të Organizuar (SBPOK), të verifikojë pretendimet e kallëzimit, të mbledhë informacionet e nevojshme dhe të intervistojë personat e raportuar.
Kallëzimi i dytë penal përfshin ministrin e Drejtësisë, Nenad Vujiq, drejtorin e Administratës për Ekzekutimin e Sanksioneve Penale, Milet Jandrić, këshilltaren speciale të ministrit, Milica Radonjiq, si dhe 60 persona të tjerë të identifikuar me emër.
Në mesin e personave të raportuar janë edhe drejtues të disa institucioneve korrektuese dhe burgjeve të qarkut, si dhe punonjës të tyre. Kallëzimi përfshin gjithashtu zyrtarë të lartë të paidentifikuar, përfaqësues dhe aktivistë të Partisë Progresive Serbe (SNS).
Për këtë rast, dyshimet lidhen me disa vepra penale, përfshirë komplotin për kryerjen e veprave penale, shpërdorimin e detyrës zyrtare, tregtinë me ndikim, dhënien dhe marrjen e ryshfetit në lidhje me votimin, mbledhjen e paautorizuar të të dhënave personale, punën e pandershme në shërbim dhe diskriminimin racor e forma të tjera të diskriminimit.
Edhe për këtë kallëzim, më 4 nëntor, Prokuroria i është drejtuar SBPOK-ut me kërkesë për të ndërmarrë veprimet e nevojshme policore dhe për të verifikuar pretendimet.
Policia është udhëzuar të mbledhë informacione nga të gjithë personat e raportuar, si dhe nga persona të tjerë që mund të kenë njohuri për ngjarjet e përshkruara.
Prokuroria nuk ka dhënë detaje të tjera rreth pretendimeve konkrete të paraqitura në kallëzimet penale dhe as nuk ka bërë të ditur nëse personat e përfshirë janë marrë në pyetje deri më tani.
The GeoPost
