Prokuroria Themelore në Mitrovicë ka nisur hetimet lidhur me ndërtimin e xhamisë në Bajgorë të Mitrovicës. Bashkësia Islame atje dyshohet për keqpërdorim të fondeve, që ishin siguruar nga donatorët. Lidhur me ndërtimin e xhamisë ishin grumbulluar afro 100 mijë euro.
Nga Prokuroria Themelore në Mitrovicë kanë konfirmuar për Gazetën Insajderi se rasti është ende nën hetime.
“Rasti të cilit ju i referoheni është në proces“, thuhet në përgjigjen e prokurorisë.
Cilat janë dyshimet që janë ngritur ndaj BI Mitrovicë?
Në vitin 2021, Krimet Ekonomike kishin filluar të mbledhin informacione rreth ndërtimit të xhamisë në Bajgorë.
Dyshimet ishin ngritur për keqpërdorim të fondeve nga personat përgjegjës në BI Mitrovicë.
“Në bazë të informatave të pranuara nga burime zyrtare ekziston dyshimi i arsyeshëm se personat përgjegjës në BI Mitrovicë dyshohet se kanë keqpërdorur fondet apo mjetet e BI“, thuhet në dokumentin të cilin e ka parë Insajderi.
Krimet Ekonomike kishin kërkuar informacione si. Kur ka filluar ndërtimi i Xhamisë në fsh. Bajgorë. Sa ka qen kostoja për ndërtimin e xhamisë. Cilët kanë qenë donatorët, sa janë mjetet qe janë derdhur për ndërtimin e xhamisë nga ana a tyre dhe sa është shuma mjeteve qe janë shpenzuar nga buxheti i BI Mitrovicë.
Në ndërkohë BIK atë kohë kishte treguar se ishin grumbulluar afro 100 mijë euro për ndërtimin e xhamisë.
“Për ndërtimin e xhamisë janë siguruar mjete me sa vijon: 60.000,00 euro nga Patine Help, 15.000,00 nga Dijaneti i Republikës së Turqisë, 10.691,00 euro nga shtrimi i sexhadeve (ndihma vullnetare të xhematit) në territorin e Këshillit të BI-së në Mitrovicë, 2.833,00 euro ndihmë nga qytetarët e ndryshëm, si dhe 10.000,00 euro nga Muhamed Ahmed Muhamed (përfaqësuesit të tij në Prishtinë z. Shaqir Kqiku), pra gjithsejtë 98.524,00 euro”, thuhej në përgjigjen e BIK, dërguar Krimeve Ekonomike.
Xhamia në Bajgorë
Tashmë rasti është në proces nga Prokuroria Themelore e Mitrovicës.
Insajderi ka provuar të marrë një përgjigje nga BIK lidhur me këto dyshime, por nuk kanë kthyer përgjigje.
